Renobacion di rijbewijs Hulandes pafo di Hulanda lo bira mas facil

DEN HAAG – Hulandesnan cu ta biba na Aruba y tin un rijbewijs Hulandes lo tin mas posibilidad pronto pa renoba nan documento digitalmente. Parlamento Hulandes a aproba un cambio di ley cu ta permiti cu rijbewijsnan por wordo renoba, reemplaza of amplia cu un categoria nobo no solamente físicamente na municipio, pero tambe online.

Te awor, habitantenan cu ta biba pafo di Hulanda mester hopi biaha bolbe personalmente na nan municipio of sigui un proceso complica  via Rijksdienst voor het Wegverkeer (RDW).

Cu e nobo regla, e persona cu tin un rijbewijs Hulandes – mesun pa esnan cu ta biba na Aruba – por mantene su rijbewijs actualisa di manera mas sencillo.

E procedimiento digital ta pasa completamente via RDW, e entidad cu ta administra e registro di rijbewijsnan y ta traha cu fotografo reconocí pa suministra foto di paspoort na un manera seguro y directo.

Ministro Hulandes di Infrastructura, Steven Tieman, a enfatisa cu e sistema aki no solamente ta scapa tempo, pero tambe ta combati fraude: “Cu un mihor calidad di foto y control electronico, e verificacion di identidad ta bira mas confiabel. Esaki ta mas facil pa ciudadanonan y mas barata pa gobierno.”

E prome aplicacion pa un rijbewijs ta keda obligatorio pa wordo haci fisicamente na Hulanda, pa motibo di registro y identificacion den e base di dato di rijbewijsnan. Pero pa renobacion of reemplazo, e nobo sistema ta ofrece un solucion, especialmente pa Arubiano/Hulandesnan cu a saca nan rijbewijs den Hulanda y ta biba awor na isla.

E cambio di ley a wordo manda pa conseho na Raad van State y ta spera entra na vigor 1 di januari 2027. Te e momento ey, e renobacion digital, manera durante e experimento anterior, ta wordo permití temporalmente.