Hopi misterio rond di cancelacion di reunion riba seguridad

ORANJESTAD – Mientras cu dos minister di gabinete Mike Eman II a confirma na NoticiaCla.com cu e reunion yama pa atende e situacion di seguridad den zona turistico a keda cancela, e motibo di e cancelacion a keda un misterio grandi. Minister Otmar Oduber di turismo a confirma e noticia na NoticiaCla.com, y mes momento a ‘lamenta’ e hecho aki. E motibo sinembargo e no por a duna. Otro protagonistanan di e reunion tambe a confirma cu e reunion a cancela, pero tampoco por a bisa pakico. Loke ta un hecho, ta cu tin algo entre cu a sosode entre e ministernan cu a pone cu esaki a cancela.

CANCELACION CONFIRMA Mientras cu NoticiaCla.com no ta bay tras di rumor, e propio actuacion di e ministernan y nan ministerio a pone cu a bay investiga kico mas tin tras di e cancelacion aki. Cada minister ta manda puntra ‘e otro minister’, mientras cu otro protagonistanan tambe a confirma esaki. Hecho ta cu NoticiaCla.com por a confirma, cu e protagonistanan a confirma nan presencia pa e reunion dialuna ainda, pa despues diamars cancela esaki abruptamente. “Puntra nan pakico a cancele” tabata e contesta cu NoticiaCla.com a haya.

MANDA CANCELA E REUNION

E reunion aki mester a tuma lugar entre gobierno, Ministerio Publico y Cuerpo policial. Tur lo a confirma nan presencia. Fuentenan serca di e caso, a indica cu for di un ministerio a yama ministerio publico pa ‘no bin e reunion’ y mescos a sosode cu cuerpo policial. Hecho ta cu e reunion aki a keda cancela abruptamente, y e hecho cu un minister ta lamenta esaki, tambe ta indica cu tin mas su tras. Mientras cu tur partido a confirma na NoticiaCla.com cu e ‘reunion a cancela’, ningun no kier of por a bisa pakico esaki a sosode.