Sean 'Diddy' Combs ta ricibi mas cu cuater aña prizon den caso di abuso sexual

 LOS ANGELES - Rapper Sean 'Diddy' Combs a ricibi un castigo di cuater aña y dos luna prizon den e caso sexual cu tabata contra dje.  E huez a bisa cu Combs a merece un castigo duro “pa mustra cla cu abuso di muhernan ta castigá severamente”. E rapper tabata haña parcialmente culpabel durante e verano aki. Un hurado a determina cu e a transporta hende pa tur Merca  cu e meta di prostitucion, incluyendo su amiganan y trahadornan sexual masculino. Pero e a wordo libera di carga mas grave,  manera trafico di hende y chantaje.

Ora di determina e medida di castigo, e huez a tuma den cuenta tambe e comportamiento di Combs despues di e veredicto anterior.  Combs nunca a admiti culpabilidad. Siman pasa e a bisa den sala di corte na su mama y su yiu cu el tabata sigur cu “lo bolbe cas”. Segun e fiscal, Combs mes tabata tin algun presentacion plania pa e siman aki den su agenda, bai den e suposicion cu e lo sali cu  un castigo liviano. “E punto maximo di arrogancia”, asina husticia a cualifica esaki.

Durante e proceso, Combs tampoco a mustra ningun responsabilidad pa loke e a haci, segun e huez. E rapper tabata por haña te  20 aña prizon. Husticia tabata kier cu Combs cumpli minimo 11 aña prizon, pero su defensa a pidi pa un castigo di un aña y dos luna,  pa cu Combs por sali liber riba fin di e aña aki.