Docternan na Colombia a detecta mas problema cu taxista Gomez

ORANJESTAD/CALI – E situacion medico di e taxista cu recientemente a keda atraca y tira, -esta e conoci Ronny Gomez-, ta un poco mas complica cu a kere inicialmente. Despues cu ayera el a biaha pa Colombia pa miho cuido medico, a resulta cu docternan colombiano mesora a detecta cu su cashi di wowo tambe ta kibra. Algo cu na Aruba mediconan no a ripara. Ademas, NoticiaCla.com a compronde for di famianan, cu docternan na Colombia no tabata contento cu e hecho cu a transporta Gomez den un avion comercial regular, enves di un avion air ambulance.

TRANSPORTA PA COLOMBIA

Manera NoticiaCla.com a raporta for di dialuna, e intencion tabata pa transporta Gomez pa Colombia pa miho tratamento ya cu na Aruba lo no tin aparatonan necesario pa sigui cu e trabou. Mientrastanto ayera merdia Gomez a biaha pa Cali, Colombia pa sigui su tratamento medico eynan. A compronde cu den avion, dado momento durante buelo Gomez a perde conocemento (cai flauw) tambe.

GARANTIA AZV

Un problema cu e famia tin aworaki, ta cu e garantia cu AZV a pone pa e tratamento, mester cambia, mirando cu e caso di e cashi di wowo kibra, no tabata den e garantia pa tratamento. Como tal awor mester warda un carta nobo pa por haci e tratamento nobo aki. Contacto cu AZV awe mainta no a duna resultado ainda, pa haya nan version riba e asunto aki.

E CASO MES

Manera ta conoci, tabata diadomingo pasa cu un grupo di hoben dilanti Benihana na South Beach Center den intento di atraca Gomez, a los tiro cu a drenta net bou di su wowo y sali net na e banda prome cu yega orea. Segun famia, e bala lo no a alcansa e cerebro. Tambe tabata averiguando e nivel di daño na e wowo y ta na specialista pa scapa e wowo. NoticiaCla.com a compronde cu e taxista lo a baha di su taxi, y dirigi su mes pa baño, y ta eyan nan lo a siguie y atrak’e y tambe los e tiro(nan). Mas informacion ta cu e tabatin sen cu e la cobra e dia ey, tanto na dollar como florin y a bay cu su celular tambe. E foto ta cortesia di ATV canal 15 su noticiero 'NoticiaAwenochi".