DJ “Afrojack” confirma pa Electric Festival na Aruba

ORANJESTAD - Nick Leonardus van de Wall, conoci como ‘Afrojack’, lo ta un di e artistanan presente den e di 3 edicion di Electric Festival na Aruba na september proximo. Awe su nomber a wordo confirma pa organisadonan y tambe na Hulanda. Afrojack, naci na Hulanda, di descendencia surnameño, ta activo den e mundo di DJ for di 2004, y ta e di 7 DJ mas rico na mundo, segun e revista mericano FORBES. Su ultimo album cu el a saca, tabata na 2014, titula ‘Forget the World’.

MAS ARTISTA

Hunto cu Afrojack, pa e di tres edicion di Electric Festival na Aruba, e co-creador die festival, DJ Chuckie a logra convence e morochonan australiano Nervo tambe pa ta parti di e festival. Tambe e ADE (Amsterdam Dance Event ) lo ta parti di e actividad. E di tres edicion ta tuma lugar e aña aki di fecha 3 pa 6 di September. Chuckie mes ta den e lineup di artista. ADE ta percura pa entre otro e ADE Global Sesions cu durante e festival ta precura pa e masterclasses, tayer y Q&A cu nombernan grandi di e mundo internacional di baile. E prome dos edicionan a atrae ambos, por lo menos 15.000 bishitante for di Surnam, Venezuela, Merca, Brazil y Hulanda.