Hulanda: Proximo RMR lo dicidi riba Aruba su ‘progreso’ cu AFT

DEN HAAG – Tin indicacion cu tin un situacion ‘nobo’ pa Aruba riba e ley di Aruba Financieel Toezicht. Por lo menos, esey ta e señalnan cu ta biniendo for di Hulanda. For di gobierno hulandes, NoticiaCla.com a haya confirmacion diamars, cu dia 4 di september proximo durante e proximo conseho di minister di Reino (RMR) den e trevezaal, decisionnan concreto riba Aruba lo wordo tuma riba ‘con Aruba a atende cu e situacion’.

REACCION FOR DI HULANDA

E contesta ta basa riba algun pregunta cu a wordo haci den direccion di Hulanda. Si 1 di augustus tabata e ‘deadline’ pa Aruba tin e ley aproba y den funcion, awor ta durante e proximo RMR Hulanda lo dicidi kico ta pasa cu Aruba riba e tema aki. No ta conoci si esey ta nifica cu Hulanda lo warda te 4 di september pa Aruba cumpli, enves di 1 augustus.

NOTICIANAN FOR DI ARUBA

Reaccionando riba e preguntanan di NoticiaCla.com, gobierno hulandes a bisa diamars cu ‘Hulanda a tuma nota di e varios noticianan cu a circula den prensa di Aruba riba e ley (LV) CAFT’. Tambe cu ‘esey ta inclui declaracion (di minister Angel Bermudez di finanzas) cu e landsverordening lo por drenta na vigor na vigor entrante 1 di augustus (aunke cu pasele despues di e fecha ey).’ Y riba esey, gobierno hulandes a sigura NoticiaCla.com cu ‘den e siguiente RMR, planea pa dia 4 di september, e situacion lo wordo discuti’. Ademas, gobierno a bisa cu ‘Hulanda ta sali for di e punto di bista, cu nos lo constata, cu esaki a wordo logra’.

DECLARACION DI BERMUDEZ

Pues no ta cla ainda si e declaracion ey (di minister Bermudez) ta uno corecto of no, pero cu a base di e discusion ey, lo determina si Aruba tin rason of no, y cu si enberdad e ley por funciona ‘cu forza retroactivo’. Tin informacion cu tin un discusion aworaki riba e tema, cu si huridicamente esey (forza retroactivo) ta posibel den e caso aki, si of no.

CAMBIO DI POSTURA

Te cu siman pasa ainda, Hulanda tabatin e postura cu ‘ta warda riba 1 di augustus’, manera programa. “Prome Minister a priminti cu e lo keda cla pa e fecha ey” tabata e reaccion cu NoticiaCla.com a haya e tempo ey. Pues Hulanda lo a warda y no tabatin motibo di duda cu Aruba lo no cumpli cu su palabracion.

NO TA KEDA CLA

Ora cu siman pasa gobierno di Aruba a confirma cu no ta mira cu lo por keda cla prome cu 1 augustus, Hulanda a confirma cu ‘enberdad gobierno di Aruba y Hulanda ta papiando riba e deadline y e advies di Raad van Advies”. Awor, cos ta parse di por tuma un buelta diferente.