Reunion riba seguridad den zona turistico a keda cancela

ORANJESTAD – E reunion ‘urgente’ cu a wordo yama pa gobierno pa diamars atardi, pa trata e situacion alarmante di seguridad den zona turistico no a tuma lugar mas. E motibo no ta conoci, mientras tin varios rumor ta circula riba e tema riba e motibo di su cancelacion. Minister di turismo Otmar Oduber (cu ta esun cu a yama e reunion) a confirma diamars anochi na NoticiaCla.com cu e reunion enberdad no a sigui, pero no kier a bisa pakico. Un otro minister tambe a confirma cu e reunion no a tuma lugar, aunke cu e la bisa mesora tambe cu e no tabata invita. Y mas protagonista pa e reunion a bisa mescos.

MINISTER DOWERS

Informacionnan cu ta circula ta cu e minister di husticia Arthur Dowers lo no por a participa, y a opta pa no tene e reunion mas sin su participacion. Mientras cu no por a haya confirmacion si ta e mandatario a cancela, por bisa si cu e mandatario a opta si pa tene un conferencia di prensa riba e tema, pa elabora riba e tema y splica kico tur ta wordo haci. No ta conoci si esey ta e motibo pa cual a dicidi di cancela e reunion planea. Por bisa si cu de hecho, e temanan di e conferecia, tabata e mesun temanan di e reunion entre gobierno, KPA y Ministerio Publico. Aki a sali na cla cu enberdad e proyecto di camara no a resulta, pero cu tin teamnan di atraco activo y mas cos ta wordo haci pa frena e ola di atraco.

PAKICO A YAMA REUNION

Tabata dialuna cu minister di turismo Otmar Oduber a informa cu ta yama un reunion diamars merdia. Motibo ta cu gobierno ta sumamente precupa cu e seguridad den e area di e zona turistico na Palm Beach, manera e.o. South Beach Center unda cu tabatin e caso di agresion y tiro contra un taxista diadomingo. Como tal, mirando e seriedad di e situacion, a yama un reunion pa diamars merdia entre gobierno, KPA y ministerio publico pa atende e situacion y wak kico ‘extra’ por haci pa e remedia e situacion di seguridad.

AREA DI PRECUPACION

Segun Oduber, e situacion ta ‘carga’ su precupacion, sigur si mira cu e mescos e por a sosode cu un turista tambe. Y si esaki sosode, e por tin un efecto devastador pa nos turismo sigur. Pa loke ta e caso di e taxista cu a haya su mes den e asunto, Oduber a lamenta esaki hopi. E conoce e persona personalmente, y a nota cu no ta e prome taxista cu ta haye den problema asina. Den pasado tabatin un taxista dama agredi formalmente, y tabatin otro cu a haya nan mes continuamente cu problema den e area.

META DI REUNION

E meta di e reunion di diamars tabata pa wak kico ta tumando lugar na e momentonan aki, y con leu ta cu e proyecto di e.o. camara. Lo kier a wak con tin cu yuda cu fondo pa e tipo di proyectonan aki. A menciona tambe riba complementacion di fondo pa Aruba hospitality Security Foundation. E visibility team di antes tabatin fondo di entre otro 750 mil florin tur aña cu tabata sali for di e fondo di ATA. “Nos kier yuda pa coopera cu otro mas miho ainda, pa sigura cu e fondonan cu nos ta poniendo e momentonan aki, ta mas rendable y tin mas productividad”.