Hooyboer: A clarifica cuanto studiante lo continua estudio den exterior

ORANJESTAD – Mientras cu enberdad tin 189 studiante cu lo sali pa Hulanda e fin di siman aki, tin mas studiante cu lo biaha proximamente pa continua cu nan estudio. Minister di enseñansa Michelle Hooyboer Winklaar, cu actualmente ta den exterior di vacacion, a clarifica e situacion diamars. E prome informacion tabata adkeri di aeropuerto cu a mustra riba e cantidad ‘limita’ di studiante cu lo mester a bay biaha e fin di siman aki. Pero ta resulta cu mientras cu e informacion ey ta berdad, otronan a scohe pa no biaha hunto cu e grupo aki. Tin otro 210 studiante cu sea a biaha riba nan mes, of ta studianto otro caminda cu no ta Hulanda.

CANTIDAD TOTAL

Na tur, e cantidad di studiante cu ta biaha pa prome biaha, ta 399, y e cifra aki ‘por aumenta’ pasobra tin peticionan cu ainda ta den proceso pa keda cla. Pa por duna un miho bista, un total di 254 studiante a dicidi di sigui nan estudio na Hulanda di cual 190 lo biaha hunto cu e beursalen nan e weekend di 1-2-4 augustus y e otro grupo, cual ta un total di 65 studiante a dicidi di biaha riba nan mes, cu tambe ta posibel. Otro studiantenan, un promedio di 42 alumno, a dicidi di bay otro region, por ehempel na Merca, Canada, Corsou y algun otro pais. E focus ta pa bay duna mas informacion di e regionan aki den e lunanan nos dilanti pa sigura cu e studiantenan cu ta den nan ultimo aña sa cu tin mas opcion cu no ta unicamente Hulanda. 

 STUDIA NA ARUBA MES

Banda di esaki tambe nos tin un grupo cu a dicidi di keda nan dushi isla pa sigui cu nan estudio. Aki nos ta referi na un promedio di 102 studiante cu lo sigui nan estudio entre otro Universidad di Aruba, IPA of na EPI. E foto ta uno di archivo di e despedida di studiantenan biahando pa Hulanda aña pasa.