MEP: Accion di firma contra Rijkswet HOFA a logra mas di 6 mil firma caba

ORANJESTAD -  “Den e prome 3 siman e accion di firma a duna tremendo resultado. 6.424 persona ya caba a firma. E accion di firma ta continua te dia e debate tuma lugar den Parlamento” asina lider di MEP Evelyn Wever-Croes a duna di conoce. Durante ultimo 3 simannan varios persona a drenta barionan pa duna informacion y busca firma contra e rijkswet HOFA, despues cu gobierno di AVP y Futuro a entrega e ley aki manera un ladron di anochi, segun Wever-Croes. 

SIN DUNA INFORMACION, SIN CONSULTA Y SIN DIALOGO

“Miles di mama y tata di famia, hobennan, a expresa na bos halto cu nan NO ta acepta loke e gobierno a haci. Sin duna informacion, sin consulta, sin dialogo, a manda un ley asina importante.  Miles di persona tambe a expresa cu nan no ta di acuerdo pa pasa e autoridadnan autonomo di nos pais den man di Hulanda, sigur sin haya mas a cambio” e lider di partido a sigui bisa. 

NO TIN UN AREGLO DI SALI AFO “EXIT”

Y finalmente tin miles di persona cu a firma contra di e hecho cu e ley no tin un areglo di sali afo “exit” debido. Manera e ley ta awor practicamente nunca mas Aruba lo sali afo.  “Nos ta hopi agradecido na e 6.424 personanan cu te awor ya a firma pa rechasa loke ta pasando. Accion di firma ta continua te dia gobierno bin parlamento pa duna cuenta. E dia ey nos lo resona e bos di e miles di mama y tata di famia y hobennan preocupa, cu di berdad ta stima e pais aki”, lider di MEP Evelyn Wever-Croes a expresa.