Accion severo contra transportacion publico illegal a sigui

ORANJESTAD – E Accion severo contra transportacion publico illegal a sigui dialuna. DTP conhuntamente cu Cuerpo Policial pa algun siman ta atendiendo cu man fuerte e fenomeno di transportacion publico ilicito, miho conoci como taxi pirata. Ta trata aki di esunnan cu ta bin busca of hiba e turistanan na nos aeropuerto sin e permisonan concerni. Entre nan personanan cu tin permiso di T-vergunning y autonan cu tin O-vergunning.

CHAUFFEUR SIN PERMISO

Asina mes durante un control a gara algun chauffeur cu no a tene nan mes na leynan existente. Esunnan cu tin O-vergunning of T-vergunning y kier practica e funcion di taxi a ricibi un aviso y si nan continua cu e practica aki, nan permiso lo keda hala aden pa un periodo di entre 2 pa 6 siman cu tur posibilidad di te hasta perde nan permiso. Durante e accion recien a constata te hasta un bus di tour a cu T y O vergunning cu tabata cobra pa cabes pa un recorido. DTP a para e bus aki baha e pasaheronan y a yama 6 taxi pa transporta e pasaheronan pa nan destinacion. Cuerpo Policial na su turno tambe a reparti algun boet.

ACTUACION PREVENTIVO

DTP ta actuando tambe den e aspecto preventivo unda ta para e turistanan prome cu nan subi e vehiculo, notificanan cu locual nan ta haciendo no ta corecto y ta yama un taxi pa hiba e turistanan na nan destinacion manera mester ta.