MEP: Gabinetenan AVP-Futuro y Schoof a kibra acuerdonan riba ley HOFA

ORANJESTAD – Partido di oposicion MEP ta considera cu no solamente gobierno di Aruba, pero tambe gabinete Schoof a kibra acuerdonan den e proceso pa yega na e propuestonan pa ley di Reino pa Finanzanan Publico Sostenibel (HOFA).

Den un carta dirigi na Tweede Kamer, Eerste Kamer y na Staten di Corsou y Sint Maarten, lider di fraccion Evelyn Wever-Croes ta yama e proceso “inaceptable” y “inhusto”. E ta pidi e parlamentonan “pa proteha e prinsipionan democratico den nos Reino.” E ex-premier ta ripara cu – contrario na e proceso normal di legislacion – e Staten di Aruba tabatin cu wordo consulta promé cu Consejo di Ministro di Reino a dicidi pa manda e propuestonan pa tratamentu parlamentario.

Wever-Croes ta referi na e “acuerdonan” cu a wordo haci den 2022 durante e reunion Interparlamentario di Reino, den cual a pone enfasi riba “importancia di dialogo, coordinacion mutuo y un actitud habri y respetuoso pa logra y mantené concenso pa ley di Reino di concenso.” E deseo di e delegacionnan di IpKo nunca a keda formalisa.

Mas aya, ta keda por di mira si Tweede Kamer y Eerste Kamer lo sigui e apelacion di Wever-Croes “pa duna nan sosten den nos esfuerzonan pa para e proceso aki.” Conseho di Ministro di Reino ta sigui e caminda regular: e propuestonan di ley a wordo publica na website internetconsultatie.nl pa tur hende – inclui e Staten – por duna su comentario, despues lo bai pa conseho na Raad van State di Reino y eventualmente – ahusta of no – lo wordo presenta pa tratamentu parlamentario den Staten di Aruba y Tweede Kamer, cu e Staten tin libertad pa pidi conseho di su mes institucionnan manera Raad van Advies.

Despues di un of mas ronda di pregunta y respuesta skibi entre Staten y Conseho di Ministro di Reino, lo sigui un debate plenario den Tweede Kamer, den cual parlamentario di Aruba por tuma parti y por presenta motonan of emendacionnan. Si e Staten di Aruba na mayoria ta rechasa e propuestonan – y pues falta concenso – e posibilidad ta chikito cu Tweede Kamer y despues Eerste Kamer lo ta de acuerdo cu ley HOFA.

Mester bisa tambe cu e lider di oposicion di MEP ta cu su lider Wever-Croes, ora cu e mes tabata premier, a firma dos bez abou e acuerdonan cu Aruba – igual cu Corsou y Sint Maarten – lo ta somete na supervishon financiero te ora cu tin un maneho financiero stabil. Un copia di e carta a wordo manda na Raad van State y Gobernador Boekhoudt.