Pa falta di placa no a pone luz ainda na fase nobo di Linear Park

ORANJESTAD – Falta di fondo, ta e motibo cu no a pone luz ainda na e parti nobo di linear park. Director di DOW Marlon Croes a confirma esaki pa NoticiaCla.com. A mustra cu ‘na momento cu a traha e fase ey, no a pone luz den dje’, Croes a bisa, siendo cu e ta bisa mesora cu a pone tur facilidad di luz si. Mirando e situacion, a dicidi di cambia e iluminacion di tal manera cu e luz di caya ta duna mas luz. “Ora cu nos tin e medionan financiero disponibel, nos ta pone e luznan echt cu mester tin riba e plaza”. Pues aworaki no tin e fondo pa haci esaki.

FALTA DI PLACA

Croes a desmenti rumornan, cu lo a haci un ‘fout’ ora cu a traha e di dos fase, unda cu lo a ‘lubida’ e parti di luz. “E no ta ningun fout. E ta un planificacion infrastructural y financiero pa nos por bay deal cu e placa” Croes a bisa. Ora cu a puntra ki tempo esaki por keda cla, Croes a bisa cu ‘momento nos tin e medionan financiero cla nos ta bay pa e luznan’. “Tur cos ta depende con e parti financiero desaroya su mes. Pa motibo financiero nos a faceer e proyecto”. Como ayudo temporal pues, ta inclui e luznan di Elmar pa duna mas luz, aunke cu e no ta e calidad cu nan a desea.

LANDSCAPING

Mientrastanto a cuminsa pone e landscaping, den forma di mata nobo, palo di coco, irigacion. “Di rotonde Las Americas pa brandweer nos ta poniendo mata, vegetacion nobo, pa duna (e parke) mas volumen.

FALTA DI LUZ

For di momento cu a inaugura e di dos fase di e linear park, a nota un interes increibel di hendenan cu a cuminsa cana riba e parti nobo. Solamente cu asina cu solo baha, e tabata bira hopi scur y mes momento poco peligroso. Sigur pa sernan femenino cu ta sinti nan mes menos bon capas di defende nan curpa den casonan di problema. No obstante esey, toch ta(bata) mira basta hende ta core ainda anochi riba e parti ‘scur’. E ayudo di e lusnan ‘extra’ di Elmar a yuda un poco, pero ainda tin cierto partinan cu ta keda hopi scur.