Palonan di bandera na spiraal rotonde ta sigui sunu

ORANJESTAD – E 35 palonan di bandera na e spiral rotonde lo keda ‘sunu’ pa por lo menos 2 pa 3 luna mas. Director di DOW Marlon Croes a confirma esaki na NoticiaCla.com Na tur, lo ta 10 luna na tur cu (contando excepcion di dia di bandera y dia di Betico) e palonan ta ‘sunu’, esta sin un bandera riba dje. Tur pa motibo cu gobierno a bestel e banderanan ‘robez’ pa e palonan. Y mirando cu gobierno no a busca mas, DOW mes a dicidi di cay aden y e mes bestel e banderanan na e compania.

BANDERA ROBEZ

Tabata na april di e aña aki cu NoticiaCla.com a raporta riba e caso aki caba, y segun Croes gobierno a bestel, pero a bestel bandera robez. “Nos a manda nan bek y awor nos mes ta trahando riba dje. Nos ta premira den e proximo dos pa tres luna prome cu nos haya nan”. Mientrastanto ta evaluando pa pone e banderanan di Aruba mes temporalmente. Pero e decision aki no a wordo tuma. “Nos tin cu wak esey ainda” Croes a bisa, mirando cu e banderanan aki ta ‘kibra’ hopi liher, mirando nan ‘tempo di bida’ ta cortico.

APRIL

Ora cu nos a raporta esaki inicialmente, Croes a sigura NoticiaCla.com cu dentro di poco lo a resolve e asunto. “Mi ta spera cu pa un luna, un luna y mei nos por remedia esaki” Croes a sigura NoticiaCla.com e tempo ey. Pero nada ainda. For di e tempo ey, a dicidi e ora cu mientrastanto pa respet pa e paisnan, no ta pone banderanan ‘daña’ y ta warda te ora cu e cargacion ‘corecto’ drenta.

BANDERA DAÑA

Segun Croes a bisa na tal occasion tambe, e banderanan cu tabatin riba e palonan na e spiraal rotonde, a wordo baha den transcurso di aña pasa, pa motibo cu e banderanan a wordo basta daña pa e biento y solo. “Consecuentemente nan tabata kibra basta hopi” Croes a bisa. Y como tal pa respet pa e paisnan, a kita e banderanan aki. “Cu esey nos a baha e mantencion pa constantemente tin cu baha nan pa drecha (e bandera) nan”.

BESTELLING ROBEZ

For di comienso di aña a haci un bestelling pa bandera nobo pero aki tambe cos a bay fout.” A yega un bestelling cu lamentablemente no a bay corecto” Croes ta sigui bisa. E fayo, tabata cu e banderanan nobo a bin imprenta solamente di un banda so. “E banderanan mester ta geprint ambos banda. Consecuentemente nos ta wardando pa nos haya e banderanan nobo pa nos por hisa nan y pone nan bek na lugar” e director a sigui bisa. Dentro di un luna, pa un luna y mei, ta spera cu e cargacion nobo drenta, pa e ora nan pone tur e 35 banderanan bek.

BIDA DI BANDERA

E bida di un bandera riba e rotonde ey ta di mas of menos 3 luna. Como tal mester di por lo menos 4 set di bandera pa e por wanta un aña. Pues mester busca un total di 140 bandera pa por wanta henter un aña.