Vocero suplente di polis Liliana Rasmijn promovi pa “Hoofdagent”

ORANJESTAD - Recientemente Alto Comisario di Cuerpo Policial Aruba, “Dolfi” Richardson a presenta e landsbesluit cu ta coresponde cu promocion di Liliana Rasmijn den e rango di “Hoofdagent”. E ta trahando e ultimo añanan den e departamento di Comunicacion y Prevencion y como tal ta e vocero suplente di Cuerpo Policial.

HONOR

“Ta un berdadero honor pa otorga promocion na e coleganan”, Richardson a expresa, e ta un muestra cu nan ta bay pa fase dos den nan carera profesional y cu esaki ta asumi tambe responsabilidad nan cu e promocion ta trece cune.

CURICULO

Liliana Rasmijn tin 17 aña trahando den Cuerpo Policial, a laga sa cu berdad e promocion ta bin cu mas responsabilidad pero cu e ta cla pa e retonan su dilanti. E tabata particularmente contento cu su yiunan por a presencia un momento asina importante den su carera.

TRAHA RIBA PROMOCION

Rasmijn a bisa cu ta despues di varios aña di a pens‘e el a dicidi cu e ta bay haci su testnan pa traha riba su promocion y un pa un el a logra nan tur tambe. El a splica cu loke e ta bisa hobennan tur ora ta conta mescos p’e; nunca nan mester give up, pero sigui bay pa nan soñonan y nan lo logra. Liliana Rasmijn ta hopi contento y orguyoso cu su logro, cu e avanse den su carera cu a cuminsa 17 aña pasa cu un combersacion cu e alto comisario e tempo ey, esta Alwin Nectar, kende a entrevist’e pa determina si un carera den polis tabata algo p’e.

HEFE DIRECTO

Su hefe directo, esta Vocero di Polis Lito Lacle y su colega John Larmonie tambe tabata presente durante e ceremonia cortico pero importante aki.