Netto Arends: Kowloon Restaurant cla pa e siguiente etapa di crecemento

ORANJESTAD - "E berdad ta cu mi idea inicial tabata pa cuminsa un “Deli Shop”, pero na caminda a cambia di idea", asina Ernesto "Netto" Arends ta corda inicio di su plannan pa bay den negoshi di restaurant, mientras cu e mes tabata trahando na DOW e tempo ey. E kier a purba algo otro y e mesun negoshi ey awe ta celebra 40 aña, cu a gosa di bon temponan y a sa di surpasa tur mal tempo tambe. "Nos ta Arubiano, unda nos ta bay? Ta aki nos ta keda lucha, cu si cos ta bon of menos bon".

META DEN BIDA

Netto Arends entretanto a alcansa un etapa den su bida cu e no ta traha tur dia pa 10 ora largo mas manera antes. Pa esey e tin su dos yiunan Ludmilla cu 32 aña cargando y manehando full e operacion di Kowloon y Lisandra 18 aña asistiendo Ludmilla. E mes ta bishita Kowloon cu frecuencia, pa sigura specialmente cu innovacion y desaroyo no ta pasa riba e calidad permanente y duradero cu e restaurant ta conoci pe.

CONSISTENCIA   "Si tin un cos cu ta distingui Kowloon Restaurant di tur otro, ta nos consistencia. Bo come un cuminda awe y despues aki 6 luna, e ta mesun bon. Pa mantene esey no ta facil, pero keremi cu nos ta traha duro, tur dia, pa purba surpasa e expectativa di tur cliente", asina e propietario y fundado di Kowloon Restaurant ta conta. Separa di consistencia den calidad di nos menu, e servicio cu nos empleadonan ta brinda, tambe ta excepcional. No ta pornada, ni tampoco ta casualidad, cu nos tin empleadonan cu casi 40 aña di servicio aki den, mientras otronan ta conta cu un trayecto largo. No solamente pasobra nos ta contento cu nan, pero ta bini specialmente di tur e bon recomendacion di nos clientenan cu ta mira den nan casi un famia.

MAS SOSTEN DI GOBIERNO

 "Mi ta masha contento y ta aprecia e sosten cu nos a haya di tur nos clientenan, specialmente esunnan cu a keda fiel na nos pa hopi aña. Sin nan, awe nos lo no a yega na un momento historico asina den nos existencia", asina Ernesto "Netto" Arends a duna di conoce. Asina mes na final, e comerciante a bisa di ta spera mas sosten y cooperacion di Gobierno, cu no tur ora a demostra un man di apoyo pa su restaurant. Den pasado a haya hopi dolor di cabes cu e proceso pa haya permiso pa su cokkinan Chinees, despues a presenta e fenomeno di adictonan ambulante cu ta molestia clientenan den vecindario y riba dje ta nota cu Gobierno a embeyece gran parti di Oranjestad y a exclui Emmastraat  y e area rond di Kowloon Restaurant. "Tin ora mi no sa mas cu ken mi papia ni kico pa mi haci, pasobra nan ta manda mi di cashi pa muraya y toch te dia di awe no tin solucion. Ta hopi placa extra nos ta inverti tur luna na siguridad, no solamente pa auto di nos clientenan pero tambe pa nos propiedad. Mi a mira Gobierno bin y bay y adictonan ambulante ta keda un molester keto bay", asina Netto Arends a expresa den un tono mas serio.

ARUBIANO ORGUYOSO

"Mi ta orguyoso di ta e unico Arubiano cu a sa di hiba un restaurant pa 40 aña, sigui pa Sra. Alicia Botta di El Gaucho pa 38 aña. Es mas, nos ta considera cu nos ta un empresa cu 30 empleado cu ta papia nos idioma papiamento, cu tambe ta sirbi como un aporte pa comunidad". Na final el a sigura cu Kowloon Restaurant lo sigui traha duro, pa mantene nan consistencia den calidad di cuminda y servicio, pero den man di e generacion mas hoben di famia Arends.