Na Corsou 6 pareha di mesun sexo femenino y 2 pareha di mesun sexo masculino a casa

WILLEMSTAD – Te awor aki, 6 pareha di sexo femenino y 2 pareha di sexo masculino a casa na Registro Civil, esta Kranshi. 

E dato aki tin relasion cu preguntanan cu parlamentario Sheldry Osepa a haci y a pidi tocante matrimonio di mesun sexo un aña despues di desision di Corte Supremo.

Dia 1 di juli 2025 Osepa a haci e preguntanan aki, y minister bou di cende Registro Civil ta cai, sra. Kimberly Lew-Jen-Tai, a duna contesta sion. 

Minister a informa e cantidad di matrimonionan cu tabatin na Corsou for di 1 di januari 2022 te cu 30 di juni 2025.

- Na aña 2022 tabatin 640 matrimonio,

- 2023 – 533,

- 2024 – 451,

- y di 1 di januari 2025 te cu 30 di juni 2025 tin 196 matrimonio.

For di 12 di juli 2024, basa riba desision di Corte Supremo, a casa 8 pareha di mesun sexo: 6 femenino y 2 masculino.

Minister Lew-Jen-Tai tambe a duna un relato di cantidad di divorcio na Corsou for di 1 di januari 2022 te cu 30 di juni 2025:

- na 2022 tabatin 209 divorcio,

- 2023 tabatin 271 divorcio,

- 2024 tabatin 305 divorcio,

- y di 1 januari 2025 te cu 30 di juni 2025 tabatin 152 divorcio.

Di e personanan cu a casa usando e desision di Corte Supremo, ninguno a divorcio.

Hunto cu e preguntanan, minister a presenta un relato cortico di experiencia di trahadonan publico cu a oficia matrimonio di mesun sexo:

1) “Como e prome ambtenaar cu a oficia matrimonio di mesun sexo, el a ceda algograndi pa mi paso tabata un momento di cambio pa pais. 

A tin un tiki ‘spanning’ paso bo no ke haci fayo den loke bo ta bisa mirando e echo cu semper ta dos persona di sexo opuesto cu ta casa. 

Pero e sentimiento mes na momentu cu mi ta casa dos persona di mesun sexo ta mesun cos cu ora mi ta casa dos persona di sexo opuesto: 

ta bai pa loke lei ta exige di mi, nada mas. Pues, pa mi no tin niun extra sentimiento. 

Mi ta haci mi trabao manera ta spera di mi, igual pa tur pareha.”

2) “Mi experiencia ta un ceremonia civil normal manera nos ta hasi e normal profesionalmente. 

Te awor mi a haci solamente 1 pareha di mesun sexo. Experiencia tabata normal, mesun cos cu cualkier otro ceremonia.”

3) “Mi experiencia cu matrimonio igual ta hopi positivo. Mi a oficia 3 ceremonia caba, for di cual mi a risibi bon feedback. 

Mi parehanan tabata super agradabel y tambe nan invitadonan. 

E ambiente durante e ceremonia tabata respetoso y inclusivo, sin difikultad. 

Mi parehanan mes tabata masha contento y a mustra gran aprecio pa e manera cu tur hende a trata nan. 

Mi parehanan tabata diversifica y esei a haci e ceremonianan mas interesante: un pareha di Merca y Alemania, un pareha residente...”

E situacion ta cu te ainda tin 3 trahado cu no ta ehecuta e parti di matrimonio di mesun sexo. 

Tin tur documentacion pa tuma un desision. 

Minister mester a informa Sindicatonan tocante posision di minister pa e ambtenaar cu ta nenga di casa pareha di mesun sexo, y con lo palabra cu e 3 trahadonan pa otro funcion.

Finalmente, minister Lew-Jen-Tai a declara cu gobierno di MFK ta respeta desision di Corte tocante matrimonio di mesun sexo.