Ruthmilda Larmonie-Cecilia(PNP) ta entrega su liderato na partido: E lo sigui den Parlamento

WILLEMSTAD - Partido Nashonal di Pueblo (PNP) a anuncia cu nan lider actual, sra. Ruthmilda Larmonie-Cecilia a pone su liderato na disposicion di partido.

Dia 10 di september ultimo sra. Larmonie-Cecilia a entrega su carta di retiro na directiva di partido, den cual oficialmente e ta pone su liderato na disposicion di directiva. Sra. Larmonie-Cecilia den su carta ta bisa cu e ta hasi esaki cu respeto y di un forma responsable, mirando cu ya el a cumpli 7 aña liderando Partido Nashonal di Pueblo.

Conforme articulo 30 di statuto di PNP, e lider politico ta keda scohe pa un periodo di 4 aña y por keda prolonga cu 4 aña mas.

Consecuentemente na e momentonan aki PNP lo mester cuminza e proceso pa nombra un lider nobo. Den cuadra aki, segun e lider ta elegante pa pone e posicio di lider di partido na disposicion di directiva, di manera cu e proceso por kana di un manera transparente.

Sra. Larmonie-Cecilia a indica mas aleu cu e lo sigui sirbi pueblo di Corsou como su representante den Parlamento di Corsou. Na momento cu tin un lider nobo, esaki por conta 100% cu su sosten.

Directiva di Partido Nashonal di Pueblo den nan reunion di dialuna 15 di september ultimo, a trata e carta dje lider. Directiva den un esfera hopi positivo y constructivo a delibera riba e contenido di e carta. Directiva a combina cu sra. Larmonie-Cecilia cu den un forma responsable lo bai start e proceso pa por yega na un lider nobo pa Partido Nashonal di Pueblo, conforme e statutonan. Directiva ta considera e desishon di nan lider actual, un desishon bon pensa, mirando cu e ta cuadra cu nan filosofia di partido di sigui rehubenese kontinuamente y duna e team di relevo espacio pa desaroya.

Mas aleu e directiva ta bisa di a gradici Larmonie-Cecilia pa su dedicacion y sacrificionan hasi durante di e 7 añanan cu el a lidera PNP. Bou di su liderato PNP a sali for di 0 asiento y yega na 4 asiento den Parlamento. Sra. Larmonie-Cecilia a fungi tambe como minister di asuntonan social pa PNP durante e periodo cu e partido tabata forma parti di gobernacion di Corsou.