Presidente di Corte Comun di Husticia saliente casi ta bira melancolico

WILLEMSTAD - Despues di un carrera di 18 aña na Corte Comun di Husticia, presidente Mauritsz de Kort na november awor ta baha pa e asumi e funcion di Gobernador di Corsou. Den e podcast ‘3’or cu Gino’ a wak bèk, hunto cu e presidente saliente di Corte, riba su carrera den husticia.

E ta bisa cu e sentimentonan ta fuerte. De Kort ta splica cu na cierto momento su deseo tabata pa bira huez, i e oportunidad pa logra esaki a presenta. Trahando pa Corte, De Kort ta indica cu e por a duna un aporte pa duna e instituto un cara riba tur e islanan Hulandes den Caribe y mustra cu Corte ta mas cu un instituto caminda cu ta bai pa haña un desishon di huez i spera cu ta resolve un problema sea completamente of pa gran parti. “Pero Corte ta mas. Corte ta tambe e instituto cu ta subraya norma i balornan den comunidad.”

“Corte tin tambe mas tarea cu trata casonan y tuma desicion.” E ta tene supervision riba entre otro notario, boticario, medico i abogacia, De Kort ta splica. For di Corte ta apunta tambe e cuerpo di supervision riba servicionan di siguridat di e islanan. “Pues, Corte ta mas envolvi den comunidad cu hopi ta pensa.”

De Kort ta sigui bisa cu trahando na Corte el a siña tur e aspectonan aki. “Bo ta cera conoci cu un instituto cu ta hopi representativo pa Reino completo pasobra ta traha cu coleganan di ex tur e islanan, pero tambe di Hulanda. Ta huntu tin cu bati cabes pa haci e trabou.”

Den esaki e presidente di Corte ta bisa cu mester sobrepasa diferensianan di cultura, respeta otro y siña stima otro. Tras di e dinamica di e organizacion a trece cu De Kort a haña cu el a traha hopi dushi na Corte durante ultimo 18 aña. Tambe el a purba di aporta na e instituto maske cu un granito. Faltando algo mas cu un luna pa traha, De Kort ta bisa cu e ta casi bira melancolico pasobra e ta yegando na un fase final.

Pa loke ta e trabou di huez riba su mes, e presidente di Corte ta indica cu esaki a siñ’e reacciona den dos fase. Na prome instante e reaccion ta obhetivo y racional y despues ta reacciona cu curason. Ora lesa un sentencia di un caso penal por tuma nota di esaki tambe, e ta bisa.

“Prome ta lesa e parti racional di e caso caminda ta splica si por prueba un acto si of laga. Despues den e parti di hustificacion di e sentencia, den caso cu e echonan ta proba, e huez ta haña e oportunidad pa demostra su humanidad teniendo cuenta cu e margen cu ley ta duna pa e huez move den dje.