Prome rijbewijs nobo di Aruba cla porfin y presenta

ORANJESTAD – Despues di hopi wardamento, un retraso grandi y un sin fin di problema, e rijbewijs nobo di Aruba a yega te cu e prome ehemplar a keda entrega ayera. Cu yegada di e ekipo nobo, Aruba awo ta cla pa procesa y imprimi su mesun rijbewijsnan, na Aruba mes y den cuestion di algun minuut. E sistema a wordo getest caba y tur cos ta trahando perfecto. Esaki Minister mr. drs. Arthur Dowers a anuncia hunto cu Comisario Irma Gordon y Inspector Ricardo Muller dialuna mainta. Minister Dowers ta gradici tur ciudadano pa nan pasenshi.

CATALAGO INTERNACIONAL

E rijbewijs nobo ta keda registra den e catalogo internacional cu ta sali na januari 2016, hunto cu e rijbewijs roos existente cu tabata wordo traha na Hulanda. Pues, pa Aruba lo aparece dos rijbewijs roos valido. E catalogo aki ta wordo uza tur parti di mundo y den dje tin registra tur e modelonan di rijbewijs cu ta legal pa cada pais. E modelo di rijbewijs internacional cu ta wordo uza na Aruba tambe ta registra den e “check-in guide” aki. RIJBEWIJS BLANCO

Comisario Irma Gordon a bisa cu no lo ta cambiando e rijbewijsnan blanco cu a otorga e ultimo lunanan cu a pasa ainda, pasobra esaki nan ta keda valido pa uzo na Aruba. Personanan cu kier biaha y kier core auto den exterior por pidi un rijbewijs internacional na Departamento di Rijbewijs pa ta sigur cu nan por huur y core auto den exterior sin problema.

KEN TA HAYA ESUN NOBO AWOR

Comisario Gordon a splica cu e prome set di rijbewijs cu lo wordo otorga ta esunnan na e personanan cu actualmente tabata wardando pa nan rijbewijs bin for di Hulanda y ta canando cu un copia di e peticion. E grupo aki ta consisti di un poco mas cu 2000 persona. E rijbewijsnan aki lo wordo otorga despues di dia 15 di augustus y Cuerpo Policial lo haci un anuncio tocante e entrega ora cu e tempo yega.

OTRO GRUPO

E otro grupo di persona cu lo haya un rijbewijs nobo ora cu e ekipo wordo poni den ful funcionamento despues di dia 15 di augustus, ta esunnan cu a pasa na prueba pa rijbewijs, pues rijbewijsnan nobo; y esunnan cu mester renoba nan rijbewijs.

RIJBEWIJS NO VALIDO DEN EXTERIOR Minister Dowers a splica cu e rijbewijsnan blanco no a wordo registra den e “check-in guide” y pues no ta valido pa uzo pafo di Aruba. E decision pa no registra e rijbewijsnan aki a wordo tuma pa asina evita cu Aruba tin tres rijbewijs registra den un tempo cortico y pasobra tambe lo no tabatin sentido pa hacie pasobra e catalogo ta sali un biaha pa aña y e no lo a keda registra na tempo pa e cambio.