Gobierno: Bank transfer tax di 0.5% sugeri pa e.o. PPP

ORANJESTAD – Si dicidi cu ta ‘bin cun’e’, ta papiando di p.e un porcentahe di 0.5%. Contestando pregunta di prensa awe mainta, e minister cu menos a pensa di toca e tema ey, a tok’e; implementacion di un ‘bank transfer tax’ of un ‘bank transfer levy’. Semper a referi e tema na e minister di economia Mike de Meza, pero awe tabata netamente minister di infrastructura Benny Sevinger cu a toca e tema di e impuesto aki . E por ta logico tambe, den sentido cu e fondo cu e tax aki lo crea, ta pa e.o. financia proyectonan di infrastructura cu ta cay bow di cartera di Sevinger.

TOLL BOOTH

Gobierno no ta bay implementa e sistema di ‘toll’ pa paga pa e uso di Green Corridor manera cu tabata wordo bisa. E mandatario encarga cu e proyecto, Benny Sevinger a desmenti esey awe mainta durante un conferencia di prensa. E no ta factibel mirando e structura di caminda y tambe e largura di dje. Si tabata un otro manera camindanan mas largo y unico, e lo por a funcion. Ta optando pa financia esaki via un posibel bank transfer levy cu ainda mester wordo concretisa.

FONDO PA KEN

Mes momento Sevinger a sigura cu e fondo cu lo e genera, no ta solamente pa proyectonan di infrastructura, sino ‘tambe’ pa esey. E motibo pa crea e fondo, ta pasobra no por keda sin uno, ora cu stop cu FDA (Fondo Desaroyo Aruba).

ESTUDIO HACI

E mandatario a haci pues un mencion di un transfer tax di p.e 0.5%, aunke cu mester haci un investigacion riba e tasa aki. E decision ey mester wordo tuma den conseho di minister, y despues aproba pa parlamento. Lo discuti esaki tambe cu e partnernan social, pero e ta un caminda pa cana. “E no ta uno definitivo, pero e ta wordo discuti pa wak si por introduci un tipo di entrada (asina)” Sevinger a bisa.