Eman: Mañan posible version ‘nobo’ di AFT ta bay Hulanda

ORANJESTAD – Entre awe cu mañan, Hulanda ta haya e ‘version nobo’ di e concepto di ley Aruba Financieel Toezicht (AFT), despues cu e ultimo concepto no a pasa e scrutinacion di Raad van Advies’ (RvA). Eman a admiti na NoticiaCla.com dialuna mainta, cu nan a haci un fayo ora di traha e ley riba ‘delegacion di cierto poder na conseho di minister di reino (RMR) of Raad van State’. “Nos a pensa cu bo por regle facilmente den un landsverordening manera e ley cu gobierno di Aruba y Hulanda a acorda. RvA a mustra nan cu esaki no por, cu tur consecuencia cu esaki por tin. Fuentenan serca di gobierno a confirma cu ta ‘poniendo final touches’ na e ley awor.

CONSEHO RVA

Awe mainta Eman a toca e conseho di RvA riba e ley, splicando cu ‘mester dun’e (e ley) un otro cuadra pa bo por pasa e tipo di responsabilidadnan aki den cuadra di reino. “Esey ta locual ta wordo traha riba dje, pa duna e fundamento pa locual nos a acorda e bachi corecto pa esaki por bay parlamento y no ta impugna cu ningun di nos reglanan di statuut y tampoco di nos staatregeling”.