Apenas 189 studiante ‘nobo’ ta biaha pa Hulanda pa studia

ORANJESTAD – Un total di apenas 189 studiante ta biaha pa Hulanda e aña aki, compara cu e mas di 300 pico pa aña. E motibo mes no ta conoci ‘ainda’. E cantidad chikito, lo bira mas chikito ainda ora cu reparti esaki den tres grupo di biahe. E gruponan ta cuminsa biaha dia 1 di augustus (diasabra awor) y ta caba diamars otro siman (4 augustus). Riba cada dia tin un grupo cu lo subi avion rumbo pa Hulanda, via Bonaire.

CANTIDAD DI STUDIANTE

Segun vocero di aeropuerto Hendrik Croes a splica NoticiaCla.com, tur cos ta cla pa nan salida. Y e hecho cu e gruponan ta chikito, no ta nifica cu tin menos trabou. E prome dia, lo tin 52 studiante, dia 2 di augustus 55, y dia 4 di augustus 82. E unico cos ta cu debi na e grupo relativamente chikito, no tin ‘special check ‘in’ manera custumber. Esey ta nifica cu si e buelo sali p.e 6:30pm, tur studiante mester check in 3 ora prome manera tur otro pasahero. 

FREE PARKING

E prome buelo ta diasabra awor, sigui pa diadomingo dia 2. Riba ambos dia, e check’ in di e studiantenan ta tuma lugar (manera un check ‘in normal), pues nan no por haci esaki mainta trempan mas manera añanan anterior. Y tampoco no tin parking pornada manera añanan anterior. Foto di archivo di NoticiaCla.com ta di e salida di e studiantenan aña pasa augustus.