Concepto pa areglo di disputa entrega na Conseho di Minister di Reino

Concepto pa areglo di disputa entrega na Conseho di Minister di Reino

Posted on 09/10/2025 9:47 am AST | Updated on 09/10/2025 9:57 am AST

ORANJESTAD / WILLEMSTAD – Presidente di Parlamento di Aruba, Marlon Sneek, siman pasa a informa presidentenan di Parlamento di Aruba, Corsou y St. Maarten y Minister Plenipotenciario di Aruba na nomber di Parlamento di Aruba lo entrega dialuna ultimo 8 di september un concepto di ley pa un areglo di disputa na Conseho di Minister di Reino. Esaki ta conforme palabranan cu e tres parlamentonan a tene den e ultimo reunion tripartit.

Den su participacion Sneek a pidi pa e parlamentonan di Corsou y St. Maarten notifica nan respectivo ministernan plenipotenciario cu a entrega e concepto di ley y pa nan duna nan cooperacion. Parlamento di Aruba ta e cu a traha e trayecto aci conforme palabranan cu a tene den e reunion tripartit dia 6 di juni 2024 entre e parlamentonan di Corsou, Aruba y St. Maarten.

E ta trata di un iniciativa di un proposicion pa un ley di Reino riba base di articulo 12a di Statuto pa trata disputanan den Reino. Riba base di motion Van Laar di 2015, Corsou, Aruba y St. Maarten a bai di acuerdo cu den IPKO a yega na e palabranan cu e areglo di disputa mester conta cu tres criterio: e tin cu ta un disputa juridico, un organo independiente mester husa e disputa (por ehempel Raad van State), y desishon final di e organo aci mester ta definitivo (“bindend”).

Ex presidente di Parlamento, Charetti America-Francisca, pa medio di un carta na juli 2024 a informa ex presidente di Parlamento di Aruba, Edgar Vrolijk, cu riba conseho di Comision di Asuntonan den Reino, Relacionnan Interparlamentario y Relacionnan di Exterior, Comision Central di Parlamento di Corsou a bai di acuerdo pa sostene e proposicion di un areglo di disputa y e trayecto cu ta canando pa pasa e areglo.

E fraccionnan den Parlamento tabatin sinembargo algun remarke relaciona cu e proposicion cu Aruba a presenta. Lider di fraccion di partido PAR, Quincy Girigorie, a bisa cu un areglo di disputa no ta kita responsabilidat pa eligi y scohe representantenan y ministernan capaz. “Por tin cuanto areglo di disputa cu bo kier, pero si bo tin un prome minister cu ta bisa cu e no ta lesa raportnan, bo por lubida cu ta yega un dia na igualdad den Reino”, Girigorie a enfatisa.

Lider di fraccion di partido MAN, Giselle Mc William, a pone enfasis cu den e areglo di disputa mester tin seguridat cu desishon di e organo independiente riba un disputa mester ta definitivo (“bindend”). “Den pasado Sekretario di Estado Raymond Knops tog a manda un proposicion Parlamento cu tabata inclui cu gobierno di Reino por pone e juicio un banda”, Mc William a bisa.

Lider di fraccion di partido Nashonal, Sheldry Osepa, ta di opinion cu mester fortifica posishon di Corsou den Reino na momento cu tin disputa, pero na mesun momento e ta bisa cu e problema no ta Hulanda so. “E problema hopi biaha ta Corsou mesun. Ningun disputa por yuda contra odio of falta di conosemento. Ningun areglo di disputa lo yuda pa eleva Corsou como pais y hib’e na grandesa. Ningun areglo di disputa lo yuda contra mente chikito”, Osepa a bisa

  • Powered by SETAR