KLM ta cancela mas cu shen buelo mañan pa motibo di welga

SCHIPHOL - KLM a cancela mas cu shen buelo pa mañan pa motibo di un welga di personal di tera. Segun  KLM, mas cu 27.000 pasahero ta afecta. KLM ta spera tambe cu lo tin vertraging, y cu esey por sigui dos te tres dia despues di welga. “Nos ta bai reprograma tur pasahero afecta lo mas lihe posibel na e proximo buelo disponibel,” un portavoz a bisa. Mayormente ta trata di buelonan den Europa. For di oficina di KLM na Aruba, a compronde cu e welga lo no afecta islanan ABC.

E trabou lo wordo para mañan mainta entre 08:00 y 10:00. Ta trata entre otro di hende cu ta carga y descarga maleta, move avionnan y yuda pasaheronan. E paro di trabou a wordo anuncia siman pasa. Sindicatonan FNV y CNV no ta satisfecho cu un acuerdo di cao cu KLM a firma cu tres sindicato chikito. FNV ta especialmente descontento cu e subida di salario cu ta inclui den e acuerdo. E sindicato kier tambe un regla mihor pa trabou pisa y mas trabou fijo. “Personal di tera ta sinti nan mes manera empleado di segunda categoria,” un portavoz a bisa. E ta referi na e bonusnan cu ta wordo duna na top di KLM, mientras cu personal di tera ta keda patras. Diaranson otro siman lo tin un paro di trabou di cuater ora.