RvA: No por implementa ley AFT manera cu e ta aworaki

ORANJESTAD – E concepto di ley Aruba Financieel Toezicht (AFT) manera cu e ta den su estado actual, no ta conta cu aprobacion di Raad van Advies (RvA). Y si no haci adaptacion na dje, RvA ta sugeri na gobernador pa no ofrece e ley aki na parlamento di Aruba. Asina e organo consultativo ta bisa den su conclusion den e conseho di 15 pagina, -cu NoticiaCla.com a apodera di dje-, dunando un sin fin di comentario riba e concepto di ley. Problema mas grandi segun RvA, ta cu e ley ta traha riba un nivel robes, y como tal mester wordo practicamente skibi di nobo.

CONCLUSION

E conclusion cu RvA ta yega na dje, ta cu ta miho pa traha e ley riba nivel di e statuut, mas specifico articulo 38, inciso 2. Esaki ta relata na e rijkswet of algemene maatregel van rijksbestuur (AMvRB)cu ta un rijkswet a base di consenso, (contrario na un AMvRB basa riba articulo 51. Di e forma ey, e ley ta haya e status di ‘ley di Reino’ y asina ta prevalece riba un ley di nivel di pais. Cu e structura aki, tur e ‘obhecionnan’ señala pa RvA ta wordo ‘remedia’.

LANDSVERORDENING (ORDENANZA)

Mes momento RvA ta subraya cu ta posibel cu pa medio di un ‘landsverordening’, por institui un organo independiente cu tin cu supervisa financieramente. Sinembargo, pa medio di un ‘landsverordening’ no por duna un organo di Reino, poder of deber, segun articulo 52 di statuut.

LIMITA PODER PARLAMENTO

Un punto cu a haya atencion sigur serca RvA den e ley, ta e parti unda cu gobierno kier ‘limita’ e derecho di parlamento (budgetrecht), pa trece cambio, y of aproba/desaproba un (ley) di presupuesto). Loke si gobierno kier haci den e ley, segun RvA, ta aumenta e poder di gobierno mes, pa medio di minister raad. Pero no ta duna motivacion pakico. (Lesa otro articulo mas extenso riba e tema aki)

TERMINOLOGIA FINANCIERO

E seccion unda cu ta relata e asuntonan financiero, tambe gobierno a ‘faya’, segun RvA. Aki ta usa terminologia nan financiero, sin duna splicacion, y of ta laga cosnan ‘bashi’. Riba e punto di nombracion di miembronan di e colegio di supervision, tambe RvA no ta laga gobierno(nan) henter. Aki e ta mustra cu e formula cu tanto Hulanda como Aruba su gobierno ta uza pa yega na dje, no ta mucho cla, y posiblemente no legal.

ARTICULONAN SCRUTINA

Loke ta hala atencion ta cu for di e 25 articulo analisa, Rv A a laga apenas 7 intacto. Un total di 18 articulo ta wordo critica pida pa pida, cu ta 2/3 parti di e articulonan menciona den e conseho. Pa loke ta e “Nader Rapport”, esta e rapport adicional, esaki mester wordo skibi di nobo. RvA ta papia di ‘cambia esaki integralmente’. Lesa e rapport completo aki.