RVA: Gobierno te awor a fracasa pa drecha finanzas publico

ORANJESTAD – Gobierno te cu awor, a fracasa den su intento pa drecha e finanzas publico di Aruba. Asina e organo consultativo, esta Raad van Advies (RvA), a señala den su conseho riba e ley di Aruba Financieel Toezicht. “Ta e speransa di e organo aki, cu (gobierno) lo atende cu e situacion pa finanzas publico duradero keda logra. Y segun e organo, -usando e ley AFT pa controla e situacion-, ta ‘apenas un di e instrumentonan cu lo yuda gobierno cu esaki’.

MANERA PA DRECHA FINANZAS

RvA tabata basta critico riba e aspecto financiero (un biaha mas), y a referi pues, un biaha mas na su conseho di e presupuesto di 2015, unda cu ta sugeri por lo menos 5 punto cu gobierno tin di traha ariba pa logra drecha e finanza publico. Entre nan, tin medida pa aumenta entrada, revisa e sistema di impuesto, tuma medida pa corta gasto, independiza cierto tareanan di gobierno, y reduci e debe di pais Aruba.

TRAHANDO AD HOC

Fuera di RvA, e propio organo consultativo ta señala tambe,  cu College Financieel Toezicht mes a bin cu su sugerencianan, ‘pero ambos no a conduci na cambionan den e presupuesto 2015’, RvA ta sigui bisa. Mientras cu e reforma fiscal ta den preparacion, y tin algun medida pa aumenta entrada introduci den forma ‘ad hoc’, casi nada te nada mes a wordo haci.

A FAYA CU DEBE NACIONAL

Riba e parti di debe nacional, tambe e organo no tabatin bon palabra pa gobierno. “E organo ta di opinion cu e gabinete por a actua mucho mas energetico, y tabata mas bien dehado cu implementacion di e protocol di diahuebs santo di 28 mei 2013”. E ta referi aki na e posibilidad pa Aruba uza Hulanda pa logra haya fiansa riba tereno internacional a cambio di interes hopi abou. “Esey lo a conduci na un reduccion di e gastonan total, pero ta percura tambe pa un reduccion di e debe nacional mas lihe”. E ta lamenta cu no a hinca e posibilidad aki den e protocol di 2 di mei 2015.

BASTA STUDIA, ACTUA AWOR

Na final di su conclusion riba e parti ey, RvA un biaha mas ta ripiti su observacion cu gobierno no a traha efectivamente usando e protocol di diahuebs santo 2013. Y mescos cu e la pone den su conseho pa e presupuesto, ‘a studia basta, y awor ta tempo pa tuma decision, mirando e trayecto (cu falta pa cana) di ley pa logra tur e cambionan. Lesa e rapport completo di Raad van Advies aki.