AVB: Giovanni Franken no ta "Bonds coach" mas di seleccion di Aruba

ORANJESTAD - Giovanni Franken no ta sigui como "Bondscoach" pa seleccion di Aruba. Asina Arubaanse Voetbal Bond (AVB) a participa den un comunicado diadomingo anochi. Segun e asociacion, “ recuperacion di e relacion a base di respet y confiansa di tur dos banda no ta posibel, “Esaki ta haci imposibel pa sigui padilanti hunto,” asina Presidente di AVB, Richard Dijkhoff a indica. Mientrastanto na Aruba un parti di e resto di miembronan di e staf tecnico a cuminsa caba cu preparacionnan y training pa e di tres rond.

CONTACTO CU FRANKEN

Den e simannan despues di e di dos rond di "World Cup Qualifier", Arubaanse Voetbal Bond (AVB) tabatin contacto cu e coach di seleccion (bonds coach), Giovanni Franken, na Hulanda. Despues di e wega na Barbados, unda Franken a anuncia cerca su team cu e kier stop, tanto e hungadonan como Franken a haci uzo di medionan di comunicacion pa specula si e lo keda of lo retira.

MANTENE FRANKEN

Considerando e deseo di e grupo di hungado y e continuacion y preparacionnan pa e World Cup Qualifiers, directiva di AVB a purba di mantene Franken. Pa medio di un “stuurgroep”, di cual Franken tabata miembro, a habri combersacion cune tocante riba su funcion y e preparacionnan pa e di tres rond di e fase di “knock out”. Aruba a bin na remarke pa hunga den e di tres rond despues cu Barbados a ricibi un sancion di FIFA. For di combersacionnan y e ultimo intercambio di cartanan cu a sigui, ta resulta cu e relacion entre e coach y AVB ta seriamente perturba y no tin solucion por lo pronto.

ATAKA VIA PRENSA

“Nos como bestuur hunto cu e organisacion a purba di mehora e relacion cu e bonds coach, sinembargo nos ta wordo ataca cada biaha di nobo via di medionan di comunicacion. Nos no kier tira cu lodo, pero for di e atakenan diario via di medionan ta resulta claramente cu no tin confiansa y tampoco respet, ni pa e organisacion, ni pa e personanan den e organisacion, cual no ta duna oportunidad pa sigui desaroya for di un nivel amateur pa profesional” e comunicado ta sigui bisa. Segun e asociacion, p’esei bon comunicacion y cooperacion ta necesario y p’esei como bestuur den interes di e deporte a haci un escogencia. “ Finalmente nos mester tene nos mes bezig como bond cu futbol y no cu un lucha continuo interno, esey no ta yuda nos sali padilanti.”

SORTEO

Diasabra e sorteo a tuma luga pa e rond final aki di “knock out”. Despues di esaki lo sali un yamada na e hungadonan selecta na Hulanda pa asina nan tambe por cuminsa cu e preparacionnan pa e siguiente rond na cuminsamento di september. E foto di archivo di NoticiaCla.com ta saca durante conferencia di prensa despues di e wega entre Aruba y Barbados na Aruba.