Gobierno na Corsou a realiza mas cu 1 biyon florin na entrada den prome mitar di ana

Gobierno na Corsou a realiza mas cu 1 biyon florin na entrada den prome mitar di ana

Posted on 09/4/2025 9:14 am AST | Updated on 09/4/2025 9:15 am AST

WILLEMSTAD – Durante e prome 6 lunanan di 2025, gobierno a haya 1.036 miyon florin (pues mas cu 1 biyon florin) na entrada. Esaki ta 33 miyon florin mas cu loke a presupuesta. Si compara esaki cu e prome 6 lunanan di 2024, ta keda cla tambe cu a ricibi mas entrada mirando cu na 2024 a registra 998 miyon florin na entrada despues di 2 kuartal.

Di e 1.036 miyon florin te ainda na entrada den 2025, un suma di 952 miyon florin ta na entrada di impuesto. Esaki ta 38 miyon florin (4 porciento) mas compara cu e mesun periodo na 2024. Colegio di Supervision Financiero (Cft), den su reaccion fecha 1 di september riba e 2do “uitvoeringsrapportage” 2025, es decir e relato financiero di e prome 6 lunanan di ana, ta bisa cu ta constata sin embargo cu cierto tipo di impuesto ta keda tras compara cu loke a presupesta. Ta trata principalmente di impuesto riba salario (“loonbelasting”) i impuesto riba bienes inmobil (OZB).

Contrario na esaki ta ricibi mas entrada cu a presupesta for di impuesto riba ganancia i impuesto riba transferencia di cas (“overdrachtsbelasting”). Pa loke ta post “otro entrada” (“andere baten”) tambe ta mira cu esaki ta keda tras (64 miyon florin) compara cu loke a presupesta (69 miyon florin). Bou di “otro entrada” ta cai entre otro entrada for di permisnan pa “online gaming”, pero Cft ta indica cu no por distingui for di e rapport financiero kuantu entrada a ricibi na permisnan pa tanto “online gaming” como otro formanan fisico di wega di placa.

GASTO

Pa loke ta gastonan di gobierno, Cft ta constata cu durante e prome mitar di 2025 gobierno a gasta 863 miyon florin, cu ta 40 miyon florin mas cu a presupesta. Entre otro, gastonan di personal a resulta mas haltu. Gobierno di Corsou ta duna como motibo pa esaki e hecho cu a paga bashi “premie” i a paga empleadonan cu ta den maximo di nan “schaal” salarial un lumpsum di 3 porciento. Gobierno ta anticipa cu pa fin di ana e gastonan di personal lo ta mas abou cu loke a presupuesta.

Pa loke ta gastonan di subsidio i transferencia, a gasta den prome mitar di ana 227 miyon florin. Esaki ta considerabelmente mas cu loke a presupesta, es decir 178 miyon florin. Cft ta nota cu gobierno di Corsou no a duna un explicacion dicon a saka 49 miyon florin mas na subsidio i transferencia.

CAPITAL

Riba presupuesto di capital, Cft ta constata cu gobierno a realiza unicamente 5 miyon florin na inversion, mientras cu a presupesta 204 miyon florin na inversion den 2025. For di e relato financiero por deduci cu obligacionnan pa inversion cu gobierno a compromete su mes pa e te ainda ta yega un suma di 52 miyon florin. Sin embargo, no ta especifica kiko e obligacionnan aki ta.

DEBE

Pa loke ta pago di debe, gobierno di Corsou a paga den e prome mitar di ana 12 miyon florin bek riba fiansa cu a ricibi. Na october awor, un fiansa di bono cu Hulanda a duna Corsou na razon di 140 miyon florin ta madura. Corsou ta den deliberacion cu Hulanda pa paga 60 miyon florin bek riba e fiansa aki, mientras cu Hulanda ta refinancia 80 miyon florin. Segun Cft, e punto di salida aki ta den e concepto di presupuesto supletorio 2025.

  • Powered by SETAR