Na Corsou, atrobe Cft ta senala riesgo y ta pidi pa traha presupuesto supletorio

WILLEMSTAD –Colegio di Supervision Financiero (Cft) na Corsou ta senala atrobe riesgonan di gobierno di Corsou cu por resulta na fin di aña den entrada mas abou y gastonan mas halto compara cu loke a presupuesta. Esaki por tin consecuencia pa e haltura di surplus presupuestario na fin di aña, segun e colegio den un reaccion fecha 1 di september riba e di dos “rapportage di ejecucion” 2025, es decir e relato financiero pa e 2 cuartal di e aña aki.

Den e relato financiero Gobierno ta duna un indicacion di un surplus riba servicio normal di 173 miyon florin y un deficit riba presupuesto di capital (kapitaaldienst). E surplus ta den lina cu loke a presupuesta, es decir un surplus di 180 miyon florin den prome mitar di aña. E deficit ta ocasiona pasobra ta usa medionan propio pa haci inversion, loke no ta menciona riba presupuesto di pais como entrada.

Cft ta bisa cu lo hiba deliberacion cu Gobierno y oficina di accountant SOAB riba e particularidad aki. Tambe e colegio ta pidi Gobierno pa duna aclaracion mas amplio di e realisacion riba e postnan presupuestario andere baten y subsidies en overdrachten y ademas pa riba termino cortico duna un pronostico riba realisacion te cu fin di aña di e postnan aki. Adicionalmente Cft ta pidi cu si resulta necesario pa haci revision di e postnan aki den un presupuesto supletorio.

Mas aleu Cft ta pidi pa drecha e balor di informacion di e relato financiero pa medio di un pronostico di liquidez pa mas tanto aña. Esaki ta duna un miho bista di e medionan di liquidez cu ta na disposicion. Tambe Cft kier un explicacion aktualisa riba desaroyonan pa un solucion pa Corsou Medical Center (CMC). E explicacion aki mester forma parti struktural di e relato financiero te ora cu formalisa e solucion. Mas aleu Cft ta referi na e sifranan preliminar di realisacion di presupuesto 2024.

2024

Den e relato financiero pa e 2 cuartal di e aña aki, Gobierno di Corsou ta duna alabes informacion preliminar riba realisacion pa 2024. For di e sifranan aki por deduci cu a realisa un surplus di 69 mion florin riba servicio normal y un deficit riba presupuesto di capital di 98 mion florin. Cu e realisacion aki no ta cumpli cu normanan presupuestario manera indica den e lei di consenso riba supervision financiero, pero segun Cft tin un explicacion si pa e deficit riba presupuesto di capital.

E deficit, segun e colegio, ta debi na cu na 2024 Corsou a financia inversionnan for di medionan propio y no a responsabilisa e medionan aki riba presupuesto como entrada. Finalmente Cft ta expresa un biaha mas su preocupacion riba e maneho financiero, segun mustra e roadmap rapportage di 26 di juni 2025.

For di e raport aki a sali cla cu tur sub-proyecto ta bou di menasa di retraso. A anula tur e encuentro plania den luna di yuli di e programboard roadmap. Ta un preocupacion pa Cft cu e progreso di e trayecto ta vago. Den su consejo riba e concepto di presupuesto supletorio 2025 Cft ta indica cu ya el a pidi pa haya informacion riba ultimo desaroyonan y continuacion di e trayecto.