Post Aruba a suspende mandamento di pakete pa Merca

ORANJESTAD - Pa garantisa claridad y confiansa den e proceso di manda y Aduana, Post Aruba NV a informa cu nan ta suspende temporalmente mandamento di pakete di mercancia of producto pa Merca, cuminsando dia 27 di Augustus 2025. “Nos ta den combersacion cu Union Postal Universal pa asina desaroya un proceso adecua pa e necesidadnan di nos comunidad”.

IMPACTO

Segun e company, nan ta compronde e impacto operacional y financiero cu esaki tin riba nan cliente individual y corporativo; y e ta nan obhetivo pa brinda un solucion sigur y efectivo. “Asina cu nos yega na un acuerdo cu Union Postal Universal, nos lo comparti comunicacion cu nos comunidad”.

ORDEN DI TRUMP

Post Aruba N.V. a informa comunidad Arubano cu desde 29 di augustus 2025 lo drenta na vigor un Orden Ehecutivo firma door di Presidente Trump, cu ta elimina mundialmente e excepcion di impuesto (de minimis) pa pakete cu ta drenta Merca cu un balor menos di US$ 800,-.

Kico e cambio ta nifica?

·         Tur pakete cu tin un balor menos di US$ 800,- awor lo mester paga impuesto. Esaki por ta den forma di un ‘ad valorem duty’ (suma cu ta abase di e balor di pakete y su pais di origen), of na forma di un tarifa fiho entre US$ 80,-/ US$ 200,- pa articulo den un periodo transitorio di seis luna, dependiendo di e tarifa aplicabel.

·         Excepcion di impuesto ‘de minimis’ ta aplicabel unicamente pa corespondencia personal (carta) y pa regalo cu un balor di menos di US$ 100,-.

Contacto pa Pregunta

Pa pregunta por tuma contacto libremente cu:

         Telefon: +297 528 7678         E-mail: customerservice@postaruba.com