Corte a ordena 24ora pa emiti rectificacion den caso di ex minister Endy Croes

ORANJESTAD – Dia 12 di augustus ultimo Corte Comun di Husticia a dicta sentencia parcialmente na fabor di ex Minister di Enseñansa y Deporte Endy Croes den su caso contra e website di noticia 24ora.com. Croes tabata keha riba articulonan cu ta bisa cu e y su famia a enrikece nan mes cu placa di e fundacion Lotto pa Deporte.

Segun Corte, e pasashinan aki ta factualmente incorecto y ta daña honor y reputacion di Croes. Huesnan pues ta ordena 24ora pa dentro di un luna publica un rectificacion riba su website. Den e rectificacion aki mester para cu Croes nunca a wordo condena pa ningun delito penal y cu proceduranan civil anterior no a establece cu el a enrikece su mes of su famia. Croes por scoge si e ta emiti e rectificacion of no.

E asunto a origina na 2010, ora cu Croes a wordo suspendi como director di Lotto pa Deporte despues di un rapport critico di Ernst & Young. Hues a termina su contrato laboral pa “motibonan importante”, incluyendo pagonan na miembronan di famia y desaparicion di sumanan grandi for di su caha di placa.

Croes a impugna e decision ey pero finalmente a perde den apelacion y den casacion. Despues, den un caso apart, Corte di Apelacion a dicta na su fabor cu Ernst & Young a actua negligentemente den preparacion di e rapport.

Sinembargo na april 2024, 24ora a scirbi cu a keda legalmente proba cu Croes a enrikece su mes cu placa di Lotto. Corte di Apelacion a considera e formulacion ey incorecto y a ordena coreccion. Un castigo no a wordo impone.

For di september 2021 pa oktober 2024, Croes a fungi como Minister di Enseñansa i Deporte den gabinete Wever-Croes II pa partido MEP. Actualmente e ta Parlamentario.

REACCION DI 24ORA

Noticiacla ta pendiente di un reaccion di e portal 24ora, cu a confirma un reaccion durante curso di dia riba e caso aki. 

NOTA, resto di e texto  tacortesia di Aruba.nu