Dowers: A haya hopi peticion extra pa permiso desde cu a anuncia flexibilisacion

ORANJESTAD – Mientras cu e no a ricibi tur cifra completo, minister encarga cu DIMAS, drs Arthur Dowers, a pasa 4000 solicitud pa permiso na Aruba cu ta inclui e periodo despues cu a anuncia flexibilisacion di permiso na Aruba. Asina e la confirma recientemente durante e programa Noticiacla LIVE. Esaki ta encera esnan cu a solicita pa un permiso despues cu e mandatario a anuncia su flexibilisacion di permiso. “No necesariamente tur e hendenan  cu a bin den e proceso aworaki, ta cay bou di e cantidad aki” Dowers a bisa, splicando cu entre e grupo aki, por tin hende cu ta cay den e grupo cu a haci solicitud pa permiso pa prome biaha. “A haya hopi peticion si den e periodo aki!” e mandatario a bisa. 

FLEXIBILISACION

Manera ta conoci, recientemente e mandatario a anuncia un flexibilisacion di permiso, unda cu esnan cu ta ilegal na Aruba prome cu 1 di juli, por drenta na remarke pa un permiso di trabou, sin problema. Ademas, nan no mester bolbe nan pais pa warda e permiso aki. Algo cu den pasado si no tabata por. Ademas, esnan cu tabata na Aruba pa reunificacion di famia, pero no por a traha, awor tambe por solicita pa un permiso. Y entre e grupo di ambos aki, a bin bastante solicitud, segun e mandatario.

ANALISIS

E mandatario a bisa cu awor ta bay haci un bon analisis di e cifra, pa wak exactamente cuanto a solicita awor y prome. E ta spera cu dentro di un siman of mas, e lo por presenta e cifranan aki. 

PROBECHA

E mandatario a pidi tambe pa tene cuenta cu ta ‘apenas’ 4 luna e periodo lo dura durante cual esnan cu por solicita pa e permiso aki, por haci esaki. Pues no ta hopi tempo. ‘Tempo ta coriendo!. Haci bo maximo esfuerso, pa bo drenta trabou’. 

POR PROLONGAE intencion ta pa logra haya 5 mil persona cu awor ta ‘indocumenta’ pero trahando, pa keda cla cu nan proceso y legalisa nan mes den e periodo aki. Si resulta cu tin mas hende cu mester, por evalua pa extende e periodo aki.