Barconan di guera Mericano den Caribe: Corsou un peon den geopolitica

WILLEMSTAD.- E yegada repentino di tres ‘destroyer’ Merikano (Aegis Destroyers – USS Gravely, USS Jason Dunham i USS Sampson), kompañá di marineronan, avion di rekonosementu P-8 i un supmarino di atake, a kousa hopi diskushon riba nos isla.  Asina e matutino di Corsou EXTRA, ta relata. E American Southern Command (SOUTHCOM) ta duna masha tiki informashon. Tambe tin “ophetonan” mas grandi ku ta biniendo for di Norfolk, Virginia, den nos direkshon, manera e Iwo Jima Amphibious Ready Group, huntu ku 22nd Marine Expeditionary Unit (MEU) ku mas o ménos 4.500 marinero, repartí riba tres barku: USS Iwo Jima (un barku anfibio enorme ku 1.700 marinero, mas ku 30 avion, helikòpter i vehíkulo anfibio), i tambe USS San Antonio i USS Fort Lauderdale. Miéntras Washington i Den Haag sa klaramente kon e senarionan ta pará, e islanan mes ta keda sin informashon. Pueblo di Kòrsou, Aruba i Boneiru ta wak barkunan di guera ta drenta nan haf, pero no tin klaridat riba e pregunta: dikon awor i kiko esei ta nifiká pa nos?

Tablero stratégiko

E vershon ofisial di Washington ta bisa ku e despliegue ta kontra kartel di droga ku ta uza e laman Karibe komo ruta di tráfiko. Esaki ta bèrdat: den lunanan pasá vários go-fast i boto di piskadó ku kokaina a keda interseptá den awanan entre Venezuela i islanan ABC. Hulanda, Kánada i Merka ta traha huntu via JIATF-South, ku e LEDET (Law Enforcement Detachments) di Wardakosta Merikano komo un hèrmènt importante.

Pero e timing no ta kasualidat. Un siman promé ku e anunsio di e despliegue Merikano, Washington a subi e rekompensa riba e kabes di presidente Nicolas Maduro te 50 mion dòler. E meta di e operashon ta kla si nos tuma un vishon mas amplio di preshon kontra Venezuela, un pais ku Merka ta akusá hopi aña kaba di ta partisipá den tráfiko internashonal di droga.

No un “Panama-senario”

Pa hopi abitantenan, e presensia Merikano ta trese memoria di Operation Just Cause den 1989, ora Merka a invadí Panamá pa kue Presidente Noruega. Pero ekspertonan ta bisa ku un ripitishon aki no ta realista. Venezuela tin S-300VM misil antiaéreo, i míles di sòldá i konsehero ruso.

Hulanda: un pais chikitu ku relevansia grandi

Remarkabel ta ku Hulanda no ta manda barkunan adishonal, miéntras ku gobièrnu tin plannan pa invertí 19 mil-mion (miar) euro den e siguiente 10 aña den material militar (5% di PIB). Parti di esaki ta destiná spesialmente pa defensa den region rònt di islanan ABC.

E motibu ta unu práktiko: e Marina Real di Hulanda tin un flota limitá. Den Haag ta opta pa un barku permanente den Karibe (normalmente un OPV di klase Holland, manera Zr.Ms. Groningen of Zr.Ms. Friesland) ku marinero. Hulanda ta stèns riba e kapasidat grandi di Merka: ‘destroyers’, supmarino, i avion P-8. Polítikamente Den Haag no ke eskalá ku Caracas. Pa nos islanan e situashon ta inkómodo: Washington i Den Haag ta riba e linia, pero pueblo den Willemstad òf Oranjestad ta keda sin splikashon.

Rusia i China: piesa den e wega di skak

E pregunta ta: te ki punto Rusia i China lo bai? Rusia ta duna apoyo simbóliko: bishita di haf, sobre buelo di avion militar, mantené arma i guera di informashon. Un movementu grandi di kapasidat for di Ukrania pa Venezuela no ta realista. 

China tin prinsipalmente interes ekonómiko. Beijing ta un gran kumpradó di petrolio venezolano i ta duna kobertura diplomátiko. Embolbimentu militar di nan banda (barku òf trupa) ta improbabel.

Turismo: e sektor mas frágil

 E riesgo mas grandi pa Kòrsou, Aruba i Boneiru no ta misil ni invashon, sino turismo. Nos islanan ta risibí sentenar di míles di turista for di Oropa, Merka, Kánada i Latinoamérika. Turismo ta forma e parti mas grandi di nos ekonomia. Pero hopi turista ta mira Karibe komo un region so. Un titular manera “U.S. warships face off Venezuela in Caribbean” ya ta sufisiente pa hasi turista skep di bini Kòrsou. Otro siman USS Gravely i USS Jason Dunham ta planiá pa un bishita logístiko na Willemstad. Ora e fragatanan drenta nos haf, e notisia ta bira mas spesífiko riba Kòrsou mes.

Kuater mekanismo di impakto riba nos turismo:

Reisadvies: Gobièrnu di Merka, Hulanda òf Kánada por duna atvertensia negativo ku ta kousa duda pa turista.

Aerolínea: Por kuminsá redusí òf evitá ruta pa ABC òf subi tarifa si tin tenshon.

Krusero: Kanselá bishita na nos hafnan direpente ounke no tin notisia negativo.

Imágen: Turista lo skohe pa “islanan trankil” manera Barbados òf Bahamas.

Un paralelo históriko: den 2019, ora tabatin protestanan grandi na Caracas, Kòrsou i Aruba a haña un kaida chikí den reservashon turístiko, ounke ku no tabatin niun insidente lokal.

Pa islanan: preparashon i komunikashon

E reto pa Kòrsou i su bisiñanan ta dòbel: nos ta stratégikamente indispensabel, pero polítikamente nos no ta sintá na mesa. Outoridatnan lokal mester stèns riba e protekshon di Hulanda i Merka, pero na mesun momento mester prepará pa efektonan negativo riba nos ekonomia.

Un posibel solushon:

Komunikashon proaktivo (Gobièrnu, CTB, CHATA) ku turista ku islanan ta sigur i stabil.

Monitor konstante e “reisadvies” i hasi korekshon via kanalnan diplomátiko inmediatamente si ta bira negativo.

Tin pakto ku aerolínea i krusero pa sigurá nos rutanan i Kòrsou komo destinashon.

E frontera militar lo keda

 E barkunan di guera den Willemstad no ta solamente kontra droga: nan ta mustra ku Karibe a bira un lugá aktivo den e luchanan grandi entre Washington, Caracas i su aliadonan. Pa pueblo di islanan ABC, e peliger prinsipal no ta misil, sino turismo. E imágen di seguridat ta frágil, i si esaki kibra, lo tuma nos basta tempu pa rekuperá. NOTA: E texto ta scirbi den Papiamento fonetico di Corsou.