Gobierno: Fianza pa estudio no ta na peliger

ORANJESTAD- Studiantenan cu ta biaha proximamente pa exterior, of esnan den exterior no mester tin miedo cu no tin placa pa nan, debi na e crisis actual. E discusion riba presupuesto ta causando incertidumbre bou di studiantenan na Hulanda y esnan cu denter di poco ta bandona Aruba pa bay studia den exterior. Nan tin miedo cu nan fianza di Aruba ta na peligro door di e situacion reinante.

Den su ultimo presentacion como Minister di Finanza y Organisacion Gubernamental, Minister Juan David Yrausquin a bisa bon cla cu e fianzanan pa estudio ta sigui y cu no tin motibo pa preocupacion.

Den e “Toelichting” riba e Decreto Gubernamental cu a wordo aproba diaranson anochi door di Parlamento ta wordo splica explicitamente cu Minister di Finanza, basa riba un Decreto Gubernamental di 2006 ta apodera pa cera contratonan cu banconan local pa financia e debenan di Aruba. “E aña’ki tambe por haci uzo di e apoderacion aki pa cera acuerdo di fiansa pa estudio.”

Pues Aruba ta fia placa for di banconan local y ta presta esaki na e studiantenan. Ta trata di un fluho di placa apart cu ta keda core, si tin presupuesto of no.

Pa loke ta e fiansanan di Aruba vigente, hurisprudencia ta bisa cu ta trata aki di obligacionnan di pais Aruba pa cu e studiantenan envolvi. E obligacionnan aki mester cumpli cu nan, sin importa e situacion politico. Asina ta cu studiantenan por ta trankil pa loke ta nan fiansa pa estudio.