Barconan di guera Mericano rumbo pa Caribe lo bishita Curaçao

ORANJESTAD  / DEN HAAG/ WILLEMSTAD - E presencia di tres embarcacion naval Mericano na costa di Venezuela lo no afecta e operacionnan di defensa Hulandes den e zona, segun un vocero a bisa. “Na e momento aki, no tin motibo pa cambia operacionnan regular den e área.” Presidente di Merca Trump ta mandando tres embarcacion naval pa Venezuela pa combati e menasa di e cartelnan di droga Latino Americano. E USS Gravely, USS Jason Dunham, i USS Sampson lo wordo desplega den e proximo lunanan. Door di desplega e barconan naval pa sur di Caribe, Trump ta aumenta e presion. E mandatario a designa varios cartel di droga como organisacionnan terorista y ta tene nan responsabel pa violencia di gang na Merca, entre otro cosnan. Recientemente el a firma secretamente un directiva, segun The New York Times ta informa, cu ta permiti uso di forsa militar contra e cartelnan.

BISHITA LOGISTICO NA CORSOU

Merca a informa Ministerio Hulandes di Defensa di e presencia di barconan naval Mericano den Caribe, un vocero a bisa NOS, yamando esaki “un operacion nacional for di Merca.” E plan di Trump ta pa opera den espacio aereo y awanan internacional. Actualmente no tin motibo pa e Ministerio di Defensa ahusta e operacionnan den e zona debi na e presencia di Merca, segun e vocero. Sin embargo, USS Gravely y USS Jason Dunham lo haci “un bishita portuario logistico na Willemstad” fin di e luna aki.