Parlamento hulandes kier claridad riba mobilisacion militar Mericano den Caribe

ORANJESTAD/ DEN HAAG /WILLEMSTAD - E situacion tenso entre Merca y Venezuela y posibel consecuencia pa Corsou, Aruba y Boneiru a hala atencion di parlamento hulandes (‘Tweede Kamer’). Miembronan di parlamento pa D’66, Jan Paternotte, Hanneke van der Werf i Mpanzu Bamenga a hasi un cantidad di pregunta na ministernan di Asuntunan di Exterior y Defensa di Reino relaciona cu e mobilisacion cu ta tumando luga na Venezuela y e desaroyonan relaciona cu seguridad den region di Corsou, Aruba i Boneiru.

E parlamentarionan kier sa si e ministernan ta na haltura di e anuncio di Merca pa mas presencia militar den Caribe den cercania di Venezuela i kico ta e bista oficial cu Reino a ricibi di Merca relaciona cu esaki. Ta referi na informacion via prensa mericano cu ta mustra entre otro cu ta hasi uso di 3 ‘aegis-destroyers’. Tambe e parlamentarionan kier sa si tabatin contacto diplomatico of militar entre Reino Hulandes y Merca sea prome of directamente despues di e desicion pa tuma e accion militar aki. Mas aleu ta puntra te kon leu e accion militar aki tin efecto riba e ‘Cooperative Security Location’ (antes base di FOL) na Corsou i Aruba.

E tres parlamentarionan ta sigui puntra kiko ta e medionan di Marina i Warda Kosta ku Reino Hulandes por usa directamente den Caribe y kico ta e obcionnan pa alsa e capacidad aki. Alabes kier sa cu ta coordina e disponibilidad di Warda Costa cu partnernan regional y mericano mirando e situacion actual y si ta necesario pa tuma extra medida di personal of material. Mas interogatorio cu e parlamentarionan hulandes tin ta si e ministernan ta bai saca a un advertencia pa aviacion civil y trafico maritimo den region di Corsou, Aruba i Boneiru.

Den caso cu no saca un advertencia asina e parlamentarionan kier sa ki medida e ministernan ta tuma pa garantisa seguridad di aviacion y maritimo den region di e islanan mirando e trafico maritimo crucero y di tankero y e structura critico di haf y kabel. Mas aleu kier sa si den cuadro di e ultimo desaroyonan ta actualisa consehonan di biahe y tambe plannan di contingencia  pa habitante- i bishitantenan di e islanan. Entre otro kier sa con ta bai omunica esaki cu habitantenan, comercio y sector turistico.

Envolvimento di gobiernonan y parlamentonan di Corsou y Aruba ta otro interogatorio cu e parlamentarionan hulandes tin. Nan kier sa tambe den ki forma ta envolvi e gobiernonan y parlamentonan den toma di desicion tocante defensa y relacionnan di exterior pa loke ta e situacion na y relacion cu Venezuela. E parlamentarionan kier contesta riba nan preguntanan mas lihe posibel y hasta kier sa si ta posibel pa e ministernan tene parlamento cu cierto regularidad informa riba desaroyonan y consecuencianan pa Reino.