Na Corsou, a demanda 8 aña prizon pa ex parlamentario Martines

WILLEMSTAD- Ayera den un kaso ku por ser konsiderá komo maratóniko, Ministerio Públiko a hasi un demanda di 8 aña di prizòn pa e èks parlamentario sr. Michelangelo “Lo” Martines pa su supuesto envolvimentu den diferente kaso di trafikashon di droga i tambe labamentu di plaka. T’asina ku Martines a presentá dilanti mesa bèrdè ayera mainta akusá di kuater kaso di trafikashon di droga i tambe labamentu di plaka. Den e kaso aki Ministerio Públiko a separá su presentashon den dos, lagando e parti di trafikashon pa un fiskal i e parti di labamentu di plaka pa otro kolega.

Segun fiskal den kasonan di trafikashon di droga den kual tin hopi plaka envolví, semper tin sistemanan pa e plaka sirkulá di un forma ‘underground’ pa asina por kubri gastunan envolví, pasobra e grupo akí no por yega na ningun banko i habri un kuenta. Di akuerdo ku e investigashonnan, Martines a laba plaka den e periodo di 2019-2024. No tin duda pasobra for di su kontaktonan por dedusí ku e tabatin un ròl importante den e preparashon, tuma plaka i pago. Ta hopi plaka ta lora den e negoshi akí, segun fiskal.

Djis pa duna algun ehèmpel, den su kontaktonan e tabata referí na pagonan di $100.000, i te asta €1 mion. Meimei e tabata papia di pagonan di $26.000 i €35.000. Un di su kontaktonan prinsipal den henter e negoshi akí tabata un tal “Mono”, ku ta un persona di Colombia, kende probablemente tabata sòru pa e haña e droga na Panamá i transportá esaki pa Europa.

Segun fiskal, ta konosí ku Martines tabata parlamentario, pues ta masha improbabel ku e tabatin tantu plaka asina pa kubri asuntunan den eksterior. Si konsiderá su karchi di kastigu, por mira ku Martines a kai será na diferente okashon pa trafikashon, i ora ku el a drenta polítika el a kontinuá manera nada no a pasa.

DEMANDA:

Promé ku el a yega na e demanda, fiskal a dirigí su mes na Martines i a deklará ku e ta lamentá ku e akusado ta tilda Ministerio Públiko di a hunga wega shushi kuné i ku esaki lo tin di haber ku polítika. OM ta hasi un trabou pa defendé e komunidat akí i konsientemente ta keda leu for di polítika. Miembronan den e órgano aki ta hasi nan bèst tur dia pa kombatí kriminalidat, pues no por papia di kòmplòt. I finalmente el a konsiderá ku 8 aña lo ta e kastigu apropiá pa Martines.

E kaso lo kontinuá dia 27 di ougùstùs ku kontinuashon di defensa di abogadonan. NOTA: Texto ta scirbi den papiamento fonetico di Corsou.