Carta Raad van Advies ta indica cu gobierno mes a tarda cu ley

ORANJESTAD – Gobierno mes a causa tardansa cu trahamento di e ley Aruba Financieel Toezicht (AFT), cu awe no por keda cla na tempo y pasa esaki pa 1 di augustus proximo. Manera ta conoci, pa 1 augustus proximo Aruba lo mester pasa e ley di AFT, sino e ta den violacion di e protocol firma di 2 di mei. Como tal den un carta di Raad van Advies (RvA) na gobierno di Aruba fecha 1 di juli, -cu NoticiaCla.com a apodera di dje-, RvA ta cuestiona gobierno su forma di proceder. E siman aki sinembargo gobierno a admiti cu nan no ta keda cla na tempo pa trate den parlamento, y a sugeri cu RvA a causa e tardansa, den un declaracion di prome minister Mike Eman. 

DOS CONCEPTO

E actuacion ‘lento’ di gobierno a conduci na e hecho cu no un, sino dos concepto cu mester a wordo traha, y di cual e contenidonan tabata uno mas complica cu e otro. Esey a pone cu, -mirando e tardansa cu cual e prome a wordo entrega-, RvA no por a garantisa un conseho ‘na tempo’ segun ‘schedule’. Pues segun RvA, gobierno no por culpa e organo consultativo di a ‘causa tardansa’.

TARDANSA DI 7 SIMAN

E carta ta referi na e tardansa di gobierno, ora cu despues cu a firma e protocol dia 2 di mei, a dura casi 7 siman prome cu gobierno a presenta e concepto na RvA, dia 16 di juni ultimo. E prome concepto a wordo manda bek, pasobra e tabata carece di ‘motivacion adicional’ y a desvia di e contenido palabra entre Hulanda y Aruba. Gobierno tabata sa 2 dia despues cu e concepto tabata malo y riba cual a dicidi di ‘revoca’ e contenido y traha un nobo.

DI DOS CONCEPTO

Pero, -segun RvA-, e di dos concepto no tabata miho. De hecho, segun nan carta pa gobierno, nan a considera esaki como mas compleho ainda, y den violacion cu constitucion. E forma con gobierno tabata ‘sugeri’ pa ‘remedia’ cierto asunto den e ley, tabata algo cu nunca ainda a wordo haci den Reino. E concepto ‘nobo’ tabata asina compleho, cu a pone cu RvA a bisa cu nan lo tabatin mester di mas tempo (cu normal) pa investiga esaki y pa keda cla cu e conseho. “Nos ta duda cu nos lo por keda cla cu e tempo (2 siman) poni pa entrega nos conseho”, e carta di RvA ta sigui bisa. De hecho nan a sugeri cu nan lo por mester por lo menos 3 luna di trabou.

DESTRUI LEY

Ademas a sugeri cu si gobierno dicidi di sigui cu e concepto aki, tal manera cu e tabata prescribi, sin cambionan necesario, e lo por nifica cu gobernador lo por uza su poder, segun articulo 21 di reglamento di gobernador, esta destrui e concepto di ley aki. RvA a finalisa avisando gobierno dia 1 di juli (fecha di e carta cu nan a manda), cu nan a avisa gobierno debidamente na tempo di e posibel tardansa, causa pa propio actuacion di gobierno. (Lesa e carta di RvA na gobierno aki).