Caribbean Cinemas a introduci su auditorium CXC na Aruba

ORANJESTAD – Caribbean Cinemas a lansa su auditorio nobo e siman aki, den un formato unico cu ta percura pa e amante di cine, experiencia e cine di un forma inolvidable. Mei mei di invitadonan special y prensa, e gerencia a deleita tur presente prome cu un cocktail hour, sigui pa e presentacion di e cine “Ant Man”, unda cu a ofrece popcorn y pepsi gratis tambe. Un experiencia cu tur esnan a sinti, y a laga comentarionan positivo so atras.

CXC

Conoci como e asina yama CXC (Caribbean Cinemas Extreme), e ta inclui un formato largo di pantaya, y riba 50 speaker (na banda, patras y te hasta riba e plafond) di e sistema Dolby Atmos digital surround sound system, 4K projection y asiento reserva pa esnan cu kier cumpra nan carchi delanta.

AUDITORIUM SPECIAL

Segun George Borges, un di e gerentenan regional, Aruba ta apenas un di e 4 paisnan unda cu Caribbean Cinemas a inverti den un tipo di auditorium asina. Fuera di Puerto Rico, tin 3 teatro asina, Republica Dominicana y Trinidad. “Y awor Aruba”. “E ta un experiencia unico unda cu bo ta lubida cu bo ta mirando un pelicula y ta kere cu bo ta parti di dje”, Robert Carrady , presidente di e compania madre, ta declara den un comunicado publicitario. Y Borges ta admiti tur esaki. “E ta un tecnologia completamente nobo mundialmente conoci. “E iluminacion cu bo lo wak riba pantaya, ta e miho cu ta existi na mundo”. Esey ta danki na e tipo di proyeccion conoci como 4K.

MERCADO

A splica cu tin un mercado grandi cu ta presenta e tipo di cine cu por wordo pasa den un auditorium asina. De hecho, por lo menos 2 pa 4 pelicula pa luna ta wordo estrena cu e posibilidad pa wordo presenta den auditorium. Como tal pa siman, por lo menos un pelicula nobo por wordo pasa den e auditorium cu e formato di Dolby Atmos .

DOLBY ATMOS

E sistema Dolby Atmos’ surround tin te cu 128 canal di audio, y riba 30 mil watt na poder. E sistema di distribucion di 360 grado di e ubicacion di e speakernan ta crea un efecto dinamico cu ta pone cu e cliente ta sinti su mes ‘parti di e cine’.

PRIJS PA CARCHI

E prijs pa cine ta casi 2 dollar mas, mirando cu ta trata di un tipo di pelicula special, mescos cu ta e caso ora cu tin pelicula 3D. A splica cu pa aworaki, un auditorium lo por presenta e posibilidad aki, pero no ta descarta cu lo por expande dentro di poco pa mas auditorium. Pa esnan cu kier cumpra nan carchi delanta, por uza e sistema di internet cu e ‘cinema express service’, of na e ticket booth mes. Y ora cu haci esaki, por reserva te hasta e asiento cu bo kier, den un forma delanta.