Meteo: Volcan Kick ‘em Jenny no tin peliger pa Aruba

ORANJESTAD - Pa Aruba e volcan Kick ‘em Jenny no tin ningun peligro grandi, por lo pronto. Ariba 23 juli, 2015 e Seismic Research Centre ubica na University of the West Indies a aumenta e nivel di alerta di codigo berde pa oranje pa e volcan submarino Kick ‘em Jenny. Esaki tabata nifica cu e islanan di Grenada, Trinidad, St. Vincent i Barbados, su publico mester sigui monitor e situacion di e volcan aki via nan canal-nan official di gobierno, i boto-nan por lo general mester evita di pasa rond di un area di 5km for di e volcan.

CAMBIO DI ALERTA

Dor di e alerta di e codigo, Departamento Meteorologico a emiti den su boletin di tempo di diahuebs cu e cambio di e alerta no ta di importancia pa Aruba i qualquier effecto di e volcan lo ta nihil pa Aruba. Masque cu a emiti un boletin toch Meteo a keda wordo inhunda cu telefonan relaciona cu e volcan Kick'em Jenny. Pesei Meteo Aruba ta brinda mas informacion relaciona cu e volvan aki.

KICK’EM JENNY

Kick'em Jenny ta un volcan submarino, ubica mas o menos 8 km noord di Grenada, i ta e unico volcan submarino den e vecindario ei cu a causa erupcion den e ultimo 500 anjan. Tambe Kick'em Jenny a erupta mas biaha cu qualquier otro volcan den e area ei. Kick'em Jenny a erupta for di 1939 casi 12 biaha. E nomber Kick'em Jenny ta bin dor di un isla chikito Diamond Rock, cu prome cu 1939 tabata yama Kick'em Jenny. Kick'em Jenny mes a wordo descrubi dor di erupcionan den juli na anja 1939. E tempo ei sinishi (as na hulandes) a wordo manda mas cu 300 meter foi superficie di lama, i diferente temblor a wordo sinti den vecindario di e volcan.

OBSERVACION BATHYMETRICO

Observacion bathymetrico actual ta indica cu Kick'em Jenny tin mas ruman unda nan a nombra un Kick'em Jack. Segun estudios e otro ruman-nan tai mas bieuw i no mucho activo.

E VOLCAN MES

Kick'em Jenny ta actualmente un di e volcanan mas mihor monitorea den mundo. E monitoreo na anja 2001 ta consisti di 5 seismometer, ed-vloed stations, tiltmeters, hydrophone i gps stations cu ta ubica den e islanan den vecindario. Estudionan ta indica cu Kick'em Jenny su top tabata mas o menos 192 meter abou di superficie di lama na 1966, i awor e ta mas hundo, na un haltura di 180 meter abou di superficie di lama.

SCENARIO 1

Actualmente cientificonan ta indica cu Kick'em Jenny por tin dos tipo di erupcion. Den scenario 1 nan ta anticipa cu weitanando e profundidad di e crater di e volcan (267m) e erupcionnan nan lo ta di e mesun tipo cu tabata pasa desde 1939. Pues leve entre un par di hora pa algun dia. E erupcionnan lo por wordo sinti pa e islanan den vecindario di e volcan como temblornan, pero no ta anticipa daño. Tambe nan ta anticipa cu e erupcion lo keda abou di lama dus lo no ta visible for di superficie. E awa rond di e volcan por bira turbulento i sushi, i e densidad por cambia, i crea algun ola, pero no ta anticipa un tsunami. Si durante algun erupcion bira un tiki mas fuerte e ora porta algun piedra por wordo lansa for di superficie di e lama.

SCENARIO 2

Scenario 2 ta indica cu si tin basta magma i e erupcionnan den scenario 1 sigui pa hopi dianan largo, esaki por hasi cu e volcan ta crece i yega mas serca di e superficie di lama. Aki e expertonan ta indica cu e lo tuma 1 pa 2 luna di erupcion continuo, prome cu su area cu ta emiti gas o otro materialnan yega 130 meter for di superficie di lama. Ora e area menciona di e volcan yega 130 meter for di superficie di lama e ora e tiponan di erupcion ta cambia i bira mas violento. Pues stof di volcan por bai basta meter halto for di lama i shinishi por influencia e islanan den vecindario di e volcan i e lama rond di e volcan por bira basta turbulento. Si e erupcion sigui e parti mas ariba por kibra i e ora ei si por crea un tsunami. E grandura di e tsunami lo depende di e grandura di e parti di e volcan cu cai den lama. E expertonan ta indica cu si e volcan bira 10 biaha mas grandi cu e ta actual, i cai den otro, e ora e por crea un tsunami di 50 meter. E mesun expertonan ta indica cu e posibilidad cu esaki pasa ta masha chikito te nihil. Tambe prome cu esaki pasa ta masha hopi cambio mester bin, unda e monitoreo moderno cu tin actual lo duna aviso-nan hopi adelanta.

Resumiendo scenario 1 lo ta mas factible cu scenario 2, pa ambos scenario e chens pa tsunami ta keda chikito. Pa Aruba bo por conclui cu e volcan no tin ningun peligro grandi, por lo pronto. Pa mas informacion por tuma contacto cu Meteo.