ATA Y APA a organisa actividad ‘Buki di Pret’ pa mucha, riba Carnival Celebration

ORANJESTAD – Recientemente a tuma lugar pa di 3 aña consecutivo e actividad di Buki di Pret. E aña aki e actividad a tuma lugar riba e grandioso crucero “Carnival Celebration”, ofreciendo na 47 participante entre e edadnan di 7 pa 12, un momento memorabel y educativo den e mundo fascinante di turismo.

E iniciativa special aki, organisa pa Aruba Tourism Authority den colaboracion cu Aruba Ports Authority N.V., ta enfoca riba inspira e futuro generacion di Aruba. E actividad ta brinda e oportunidad exclusivo pa por experencia e industria crucero di mas cerca. Pero tambe ta un oportunidad pa combina diversion cu educacion.

E dia tabata yena cu diferente actividad, entre otro un recorido den e crucero, a disfruta di un dushi plato di cuminda, diferente weganan y un despedida cu regalo pa nan “back to school”. E alegria cu e muchanan a expresa na final ta subraya con exitoso e actividad aki tabata ta.