No tin control si dunado di trabou ta cumpli cu ley!

ORANJESTAD – No tin control di gobierno riba e aspecto laboral. Algo cu president di sindicato FTA, Hose Figaroa ta condena. Durante e programa Noticiacla LIVE, cu porcierto a inicia su temporada nobo diahuebs, Figaroa a bisa cu mester urgentemente bin control riba con e leynan laboral ta wordo maneha y si ta cumpliendo cu esaki. “No tin control”, Figaroa a contesta rapidamente, ora cu e moderador di e programa, Tito Laclé a puntra Figaroa. Y segun Figaroa, no ta cos di awo, sino di añanan caba, cu ta bogando pa tuma lugar. “Tanto bal bo tin ley y bo no ta controla si dunado di trabou ta cumpli cu e leynan aki”. 

GOBIERNONAN TA FAYANDO

Segun Figaroa, e la bisa e minister nobo di labor Wendrick Cicilia, pero mas pio ainda, a bisa minister’nan’, den pasado. Tur minister a wordo bisa, y nan contesta tabata cu si, e control mester bin, pero cu no tin personal pa haci tal. “Nos no por keda tira culpa riba esey! Si tin tekort na personal, mester busca manera pa bin cune. Nos tin añas literalmente ta papia di esaki. 

SITUACION INCORECTO NA PIA DI TRABOU

E ta bisa cu si tin situacionan incorecto na pia di trabou, e unico manera cu por bin cambio, ta si e trahado bay saca su nek, pa bay raporta esey. “Y bo sa kico ta pasa ora cu un trahado haci asina. Mesora bo ta bay haya cu dunado di trabou ora nan haya sa, ta bay tuma paso contra nan. Y si bo tin un arbeids inspectie cu ta bay regularmente na pia di trabou, haci control, e trahado e ora no mester ta esun cu ta trek aan de bel” Figaroa a sigui bisa.