ABC a presenta otro campana satirico, usando Tres Trapi e biaha aki como atraccion!

ORANJESTAD – Un biaha mas por tuma nota di un campana satirico di Aruba Birdlife Conservation (ABC) , dirigi pa ilustra con e situacion di nos naturalesa por bira, debi na e.o. sobrepoblacion di turismo. Den pasado caba, un campana similar a hala hopi atencion, unda cu a pone enfasis principal riba Tortuga. E biaha aki a usa e beach na Tres Trapi, cu recientemente a figura como potret pa ilustra un logro grandi di turismo pa Aruba. ABC a usa e mesun lugar aki, cu ayudo di AI, pa crea un anuncio satirico, pa crea concientisacion, cu e titulo : Bon Bini na Tres Trapi, Aruba su Secreto Miho Warda! Den e texto formula, ta usa tambe otro angustia di ABC, e uso masal di e vehiculonan teraneo UTV. “ Buscando e experencia mas autentico na Aruba? Bo a hañ’é! Tres Trapi ta nos isla su orguyo y alegria! Un bahia trankil y intacto caminda localnan y bishitantenan ta bini hunto pa disfruta di naturalesa puro... cu djis un tiki yudansa di 160 di nos bishitantenan cu ta yega diariamente den UTVnan elegante.

KEHO CONTRA MANEHO TURISTICO

Siguiendo cu e texto satirico, ta haci bofon di e expertonan turistico riba e tereno aki tambe. “ Nos expertonan di turismo ta sumamente orguyoso di loke nan a logra aki. Un tempu djis un lugá chikitu trankil i relaha, Tres Trapi awor ta un atraccion di clase mundial! Y e miho parti? Nos ta planiando pa hacie miho ainda. Imagina bo ta mehora e parkeer pa otro 75 UTV y 50 palapas bunita cu ta para na costa, pa bo por disfruta di bo experencia di wak turtuga den sombra y comodidad.  Progreso grandi! Un Isla Feliz”.

IMPACTO LOCAL

Tambe e texto ta finalisa ilustrando e efecto pa cu nos localnan. “Fin di siman ta extra special, ora famianan lokal bini aki pa nan tempo trankil priva. Apenas lo bo ripara nan entre e zundramento alegre di turistanan, e zundramento di motornan, e holo original di exhaust y e banda di zonido suave di esnan cu ta buska selfie. No sali sin saca un potret di bo mes y 20 hende straño cu tur ta comparti e mesun turtuga na mes momento”.