Staff y gerencia di Elmar a haya otro awe mainta atrobe!

ORANJESTAD – Awe mainta na oficina di mediado di gobierno Anselmo Pontilius, e sindicato Alvast (cu ta representa e staf di NV Elmar), lo firma un protocol cu e gerencia di e compania, poniendo un paro na nan accion. Awe mainta e mediado Pontilius a confirma na NoticiaCla.com cu partidonan ‘a haya otro’ y cu tabata tratando pa firma e documento awe mainta ainda prome cu 11’or. Segun Pontilius, partidonan a bay 'redacta e contenido final na abogado', y 'lo trata di firma prome cu 11'or di mainta. 

REUNION AWE MAINTA

Manera NoticiaCla.com a raporta anteriormente, awe mainta un reunion 8'or tin mester a determina si e accion cu tin, ta continua mas den dia tambe. Te cu ayera tardi, e trahadonan cu ta cay bou di ‘staff’ di NV Elmar, ainda tabata den ‘accion’, pues no na trabou. Den combersacion cu e mediado di gobierno Anselmo Pontilius, e la splica NoticiaCla.com cu aunke cu a trata di resolve e asunto, e partidonan ta basta leu di otro y como tal ta keda den accion. Esey no ta kita afo cu a logra sinta na mesa, y purba logra firma un protocol. “Nos a firma 6 punto, pero nan a bin cu 4 punto mas” Pontilius a bisa di e trahadonan. Y den curso di diahuebs anochi, mester a tende di nan hendenan si e accion ta keda of no.

INTERVENCION DI MEDIADO

Segun Pontilius, ta for di diaranson mainta e trahadonan tabata den accion, y ta for di diaranson atardi e ta envolvi den e combersacionnan pa logra haya partidonan bek na mesa y tambe na trabou. E intencion di e protocol, ta pa logra sigura cu pa e proximo 4 simannan, no tin accion, y cu durante e periodo ey, nan lo por sigui traha y resolve e diferencianan di opinion cu tin.

INICIO DI ACCION

Un grupo di 28 miembro di staff di Elmar ta den accion pa motibo di decision unilateral di gerencia. Segun presidente di e sindicato Alvast, Raymond Maduro, gerencia a tuma algun desicion riba un aspecto di SVB sin consulta cu e sindicato. Specificamente, con pa e.o. registra ora di AO, y tambe otro asuntonan administrativo cu antes tabata diferente. Segun Maduro, no tin nada contra pa cambio asina, contal cu nan haya participacion. Mientrastanto e miembronan di staff ta keda protesta te ora cu gerencia resolve e problema. Pa 3'or awe tardi tin un reunion cu mediador di gobierno pa wak si por soluciona e problema. NOTA. E foto ta di archivo di e prome dia di accion diaranson ultimo, ora cu trahadonan miembro di staff di NV Elmar tabata para pafo di e edificio na Playa.