St. Maarten bou di un ‘tropical storm watch’ pendiente di tormenta Erin

PHILIPSBURG - St. Maarten for di djaweps atardi ta bou di un 'tropical storm watch'. Ayera tambe  tormenta tropikal Erin a sigui oumentá na forsa. E tabata move den direkshon wèst ku un spit di 17 mia pa ora. E spit di bientu sostené di e sistema a yega entretantu 70 mia pa ora.

Ta kalkulá ku e sistema lo pasa djasabra na 145 mia nort – nort ost di St. Maarten. Ta pronostiká ku e sistema lo sigui oumentá na forsa i ku den kurso di dia awe e lo bira un orkan. Esaki pasobra Erin ta bai yega mas serka di Karibe kaminda e temperatura di laman ta mas haltu.

Pa e wikènt aki mes Erin por bira un orkan di kategoria haltu. Servisio meteorológiko di St. Maarten ta mustra alabes ku no tin siguransa riba e ruta ku e sistema ta sigui. Kondishonnan ku e sistema lo trese kuné ta yobida kompaña ku bos i welek, bientu fuerte i olanan haltu

Den su reunion di djárason e “Emergency Operating Center” (EOC) di St. Maarten a hiba diskushon spesífikamente riba tormenta Erin ku ta na kaminda pa Karibe i ku posiblemente lo bira un orkan den kurso di dia di awe. Den e reunion tabata presente tur 10 “Emergency Support Functions” (ESF’s) di St. Maarten huntu ku otro stakeholder. Tabata un reunion planiá den kuadro di preparashon pa temporada di orkan, pero el a kai huntu ku e echo ku tin un tormenta tropikal na kaminda.

Promé minister di St. Maarten Luc Mercelina a presidí e reunion. Servisio meteorológiko di St. Maarten a duna último informashon relashoná ku tormenta tropikal Erin. Entretantu Ministerio di Bibienda Popular, Planifikashon Urbano, Medio Ambiente i Infrastruktura a saka un anunsio kaminda ta urgi tur kontratista i doño di propiedat pa sigurá tur material di konstrukshon riba nan propiedat pa asina sigurá seguridat di públiko en general.

Mester warda tur lokual ta palu, heru, waya, i otro materialnan pa konstrukshon di kas. Tambe gobièrnu di St. Maarten a saka un atvertensia pa no trafiká den sierto áreanan debí na peliger pa inundashon. Ta trata di A.T. Illidge Road, Arch Road, Zagersgut, Beacon Hill Road, Belvedere Border Point, Billy Folly Road, Emmaplein, L.B. Scott Road, Rhine Road, Welgelegen Road, Well Road i Yrausquin Boulevard.

Mercelina for di djárason a enkurashá tur siudadano di e isla pa vigilá desaroyonan rondó di Tormenta Tropikal Erin i kontinuá ku nan preparashonnan pa temporada di orkan. “Nos ta aktualmente den e lunanan mas aktivo di e temporada di orkan. Mi ta urgi tur siudadano pa tuma e tempu aworakí i sigurá ku nan famia, kas i negoshi ta prepará. Preparashon ta di vital importansia, i no pániko. Gobièrnu ta keda proaktivo pa salbaguardiá pais, i nos lo keda informá públiko ku informashon ofisial i korekto”, Mercelina a deklará.

Ta konsehá tur siudadano pa revisá nan plannan personal i di nan famia pa temporada di orkan, sòru ku tin produktonan esensial manera awa na bòter, kuminda di bleki, bateria i remedi na stòk, ku ta tuma tur medida nesesario pa protehá propiedatnan i sigui último informenan di gobièrnu i servisio meteorológiko di St. Maarten. “Mi no por enfatisá sufisiente pa por fabor sigui solamente fuentenan di informashon ofisial i konfiabel. Evitá rumor i spekulashon. Huntu, pa medio di preparashon i union, nos lo sigui perseverá”, Mercelina a finalisá bisando. NOTA: Texto ta scirbi den papiamento fonetico di Corsou.