Total di 12 hotel na Aruba operando sin un permiso legal

ORANJESTAD – Un total di 12 hotel na Aruba ta operando sin un permiso. Esaki a keda confirma pa minister di turismo Otmar Oduber awe mainta na NoticiaCla.com. Aparentemente un descuido di añanan largo a pone cu e asunto pa un periodo largo (cubriendo varios gobierno di pasado tambe) no a keda coregi. E mandatario encarga a mustra cu awor lo bay traha pa resolve e problema aki y ta duna e hotelnan un periodo di 1 aña pa traha riba dje. Mientrastanto e hotelnan por sigui opera normal.

SERA PORTA

Den un caso ‘normal’, tur e hotelnan aki lo mester a sera nan porta mesora, debi cu nan no tin un permiso di operacion. Pero ta obvio segun e mandatario, cu no por haci esaki mirando cu bo ta paralisa parti di nos turismo. Tambe, mester ta cla cu e hecho cu nan no tin e permiso sea completo of actualisa, no ta nifica cu nan ta operando ‘ilegalmente’. Nan ta opera segun standard y regla, pero solamente e documento nan no tin actualisa. Tur resto di cosnan nan tin na ordo etc.

NOMBERNAN DI HOTEL

E mandatario no a specifica cua ta e hotelnan cu no tin e permisonan legal, sino solamente bisa cu ta trata di un cantidad relativamente grandi di 12 hotel riba nos isla.