Ekipo di Aruba preparando pa siguiente rond di FIFA World Cup

ORANJESTAD – E seleccion di futbol di Aruba ta preparando pa siguiente rond di FIFA World Cup Qualifier. Ayera Arubaanse Voetbal Bond (AVB) a anuncia cu e seleccion di futbol nacional ta preparando cu energia positivo y trainingnan intensivo pa nan siguiente wega den e serie di FIFA World Cup Qualifier. Nan meta ta pa “bay unda ningun otro seleccion Arubano a yega di bay”, un wega mas, un rond mas. E coach di seleccion Giovanni Franken a traha nan programa di entrenamento pa nan y ta trahando hunto cu Herbert Beeldsneijder y Marvic Bermudez como asistentnan pa realisa e meta poni nan dilanti.

PALABRACION CONCRETO

Den e ultimo dianan e coach di seleccion a haci palabracionan concreto cu e staf tecnico na Aruba pa percura cu tur dos grupo di atleta, tanto esunnan na Aruba como esunnan na Hulanda ta prepara na e mesun manera pa e wega grandi nan dilanti. Cu hungadonan staciona asina leu for di otro ta rekeri pa e liderazgo traha cu un coordinacion excelente, locual ta tumando luga tambe.

PROXIMO WEGANAN

E proximo weganan di e World Cup Qualifiers pa Aruba, ta poni pa tuma luga riba dianan 4 y 8 di september 2015. For di e dos gruponan di hungado lo selecta e team cu lo bay hunga e weganan. E team cu Aruba mester enfrenta na september lo bira conoci riba dia 25 di juli durante di e sorteo cu ta tuma luga na St. Petersburg, Russia. E sorteo aki ta inclui 141 pais.

REGION DI CARIBE

Pa e region di Norte y Centro America y Caribe tin 10 ganado di rond dos, esta Canada, El Salvador, Guatemala, St. Vincent & the Grenadines, Grenada, Antigua & Barbuda, Belize, Aruba, Nicaragua y Corsou cu ta uni cu Jamaica y Haiti pa e di tres rond.

SORTEO 25 JULI

Pa e sorteo preliminar di dia 25 di juli, e teamnan lo wordo dividi den dos grupo, cual ta wordo determina pa e FIFA/Coca-Cola World Ranking di juli 2015. For di cada grupo ta scoge un team pa enfrenta otro den weganan cu lo tuma luga entre dia 31 di augustus y dia 8 di september, 2015.

EKIPONAN GANADO

E ekiponan ganado lo pasa hunto cu Costa Rica, Mexico, Merca, Honduras, Panama y Trinidad & Tobago pa e di cuater rond. Pa e rond aki lo tuma luga un sorteo na Konstantin Palace pa weganan cu ta tuma luga entre dia 7 di november 2015 pa dia 6 di september 2016. Pa rond cuater lo tin 12 ekipo den tres grupo di cuater team cada uno. E ganadonan di rond cuater lo pasa pa rond cinco pa cual detayenan lo wordo anuncia na su debido tempo.