AZV riba bon caminda pa tin miho control dsu gasto y entrada

ORANJESTAD - AZV bao un maneho bon controla, ta conociendo crecemento di su gastonan na un forma sostenibel, como tambe un rebaho den e gastonan di cuido. E cifranan aki semper ta wordo midi y presenta den porcentahe cu ta refleha tambe e crecemento y rebaho den e cantidad di cliente si y ora cu esaki presenta. Recientemente AZV a publica su cifranan di entrada y gastonan pa e periodo di 2010 pa 2013, comparando e situacion di aña pa aña. Aki ta constata cu e organisacion ta riba un bon caminda pa cada dia tin miho control riba su gastonan y entradanan y e relacion entre e dos factornan importante aki. Loke ta resalta, entre otro, ta e reduccion di gastonan di operacion, cual a baha di 19.1 miyon florin na 2009 pa 16.1 miyon florin na aña 2013. Esaki ta un reduccion di 3 miyon florin, den porcentahe 15.7% logra den apenas 4 aña. Entre otro e cifra aki ta refleha e determinacion di e organisacion mes tambe pa ta mas eficiente y inverti su fondonan pa maneho den un forma mas efectivo.

E gastonan total di AZV a conoce un crecemento modera pa aña entre 2010 y 2013, cu a bay ta disminuyendo tambe considerablemente, esta di 3.5% na 2010 pa 0.3% na 2013. E total na gastonan di AZV ta principalmente determina pa e gastonan di cuido medico, riba cual tin miho control awendia y te hasta por wak un rebaho den su crecemento. Comparando e cifranan di 2010 pa 2013, por mira cu pa medio di algun cambio y decisionnan, AZV a mira gastonan di cuido crece na 2010 cu 4.1% y na 2013 cu apenas 0.5%. Pa loke ta e entradanan di e organisacion, AZV a conoce un crecemento di 26.2% (di 187.6 miyon na 2010 pa 236.7 miyon na 2011) den entrada na 2011, entre otro como consecuencia di un aumento den e prima cu AZV.

Na aña 2013 e entradanan a conoce un rebaho leve di 1.1%, probablemente pasobra cu economia di Aruba a conoce un crecemento negativo na 2012, sigui pa un crecemento limita na 2013. E entradanan di AZV a bay di 236.7 miyon na 2011, pa 252.2 miyon na 2012 y 249.4 miyon florin na 2013. E evaluacion di e cuentanan anual (Jaarrekening) di AZV ta mustra cu durante di añanan, for di 2001 pa 2013, cu a logra baha tambe e parti di contribucion di caha di pais Aruba directamente den entradanan di AZV. Si compara aña 2001 cu aña 2013, por nota un desaroyo positivo, unda cu AZV a bira mas “self sustaining”, o sea ta mantene su mes principalmente riba entradanan for di primanan cobra for di su aseguradonan. Na 2001, e contribucion di pais Aruba tabata 60% di e total di e entradanan di AZV, unda cu na 2013, a logra baha esaki te na 33%. AZV ta dirigi na brinda e miho servicio na su aseguradonan, percurando pa relacionnan cu proveedornan di cuido di calidad halto, vigilando e relacion entre su entrada y gastonan pa percura cu aseguradonan por depende riba un organisacion solido y sostenibel.