Spirit Airlines ta teme pa su sobrevivencia atrobe!

MIAMI - Spirit Airlines, cu a sali for di restructuracion di Capitulo 11 cinco luna pasa, ta un biaha mas bati alarma tocante su futuro. E compania di aviacion mericano di prijs abou ta adverti cu e no por sobrebibi si e no recauda capital adicional lihe. Spirit ta e di shete compania di aviacion mas grandi na Merca y ta opera casi 200 avion den Nort y Centro America. Spirit ta bula tres biaha pa siman pa Aruba for di Ft Lauderdale, esta diahuebs, diasabra y diadomingo. 

Despues di un reorganisacion amplio bou di proteccion di debedo, e compania a purba di reconstrui su fortunanan door di enfoca riba productonan premium y mas sparmento di gasto. Por ehempel, Spirit a anuncia na fin di luna pasa cu e lo pone 270 piloto riba vacantie sin pago den augustus. Pero esaki ta parse di ta insuficiente.

Den su relato trimestral, e aerolinea ta informa cu e ta enfrentando condicionnan di mercado persistentemente desfaborabel. “Nos ta enfrenta un sobrecapasidad signifikante riba buelonan domestico y demanda debil continuo pa biahenan di tempo liber domestico den e di dos cuartal di 2025, creando un ambiente di prijs dificil,” e compania a bisa, segun CNBC.

E resultadonan financiero di Spirit no ta mehora na e ritmo necesario. Como resultado, e compania di aviacion mester urgentemente di capital adicional. Si no hasi esaki por resulta den un incumplimento y un crisis financiero nobo. Pa evita esaki, e aerolinea ta explorando diferente opcion, incluyendo benta di avion y bienes raíces.