Corsou lo no tin ‘efo-toets’ na fin di aña escolar 2025-2026

WILLEMSTAD- Na final di aña eskolar 2025-2026 alumnonan di grupo 8 di enseñansa di fundeshi lo no traha e ‘efo-toets’. Asina direktor di sektor di kultura i siensia na Ministerio di Enseñansa, Siensia, Kultura i Deporte (OWCS), Wladimir Kleinmoedig, ta deklará pa EXTRA. E ‘efo-toets’ ta e prueba final ku huntu ku e ‘onderwijskundig rapport’ tabata determinante pa e karera di enseñansa sekundario di e alumno.

Kleinmoedig ta splika aña eskolar 2025-2026 ta bira unu di transishon. Esaki ta enserá ku na final di e aña eskolar alumnonan di grupo 8 lo no trata e ‘efo-toets’. Banda di esaki ta desaroyá huntu ku direktivanan di skol un ‘onderwijskundig rapport’ nobo ku ta duna un mihó refleho di abilidatnan di e alumno.

A base di e rapòrt ta determiná e nivel ku e alumno lo sigui den enseñansa sekundario. Huntu ku e ‘onderwijskundig rapport nobo’ ta desaroyá alabes un guia di konseho nobo pa maestronan di skol. Esaki mester yuda e maestronan yega na un profil mas ophetivo i mihó posibel pa e alumno, a base di karakterístikanan di e mucha, ku ta determinante pues pa e konseho final di e futuro karera eskolar di e alumno.

Banda di esaki Ministerio di OWCS huntu ku direktivanan di skol ta bai investigá, den kooperashon ku ekspertonan den enseñansa, ki tipo di prueba ta mihó pa bini na lugá di e ‘efo-toets’. E prueba nobo aki mester ta un sosten den determiná kua ta e mihó direkshon di edukashon sekundario pa un alumno. Komo ehèmpel Kleinmoedig a bisa ku entre otro ta bai studia e ‘doorstroomtoets’ ku ta usa na Boneiru pa alumnonan ku ta kaba enseñansa di fundeshi i wak si esaki ta aplikabel pa Kòrsou.

Intenshon ta ku e proyekto pa yega na un prueba final nobo ta kla na tempu pa introdusí esaki na final di aña eskolar 2026-2027. Kleinmoedig ta indiká mas aleu ku e direktivanan di skol ta envolví den desaroyo di un prueba nobo pasobra konforme e lei di enseñansa sekundario, e direktivanan di skol por disidí ku e alumno ta hasi un prueba pa determiná su nivel pa por sigui un skol di nivel havo. “Esaki ta un outoridat i responsabilidat di e direktivanan di skol, loke ta lógiko tambe pasobra ta nan ta sigui atendé ku e alumno na skol.”

E direktor ta sigui splika ku enseñansa ta un siensia, loke ta hasi nesesario ku kontinuamente tin evaluashon i investigashon pa wak unda ta nesesario pa hasi adaptashon i mehorá e sistema. Finalmente Kleinmoedig ta bisa ku pronto Ministerio di OWCS, den kolaborashon ku departamento di komunikashon di gobièrnu, lo lansa un kampaña di informashon pa asina komunidat kompletu ta na altura di e desishonnan ku a tuma i prosesonan ku ta andando. NOTA :Texto ta scirbi den Papiamento fonetico di Corsou.